Afrıka jaıyny Aqtóbede ósiriledi

«Murager» jaıyndy jabyq sý basseıninde ósirip qana qoımaı, ony óńdep, ónimdi dúken sórelerine jetkizýdi maqsat etip otyr. Bul is eń aldy­men jaıynnyń analyq túri­niń shabaqtaryn Reseıden ákelip ósirýden bastalypty. Qazir ýyldyryq shashatyn kez de jaqyndap qaldy.

Balyq ónimderi kóp jaǵ­daıda elimizge shet memleketterden jetkiziledi. Al jańa joba bul baǵyt­taǵy ımporttyq taýar­­lar­dyń kólemin azaıtyp, keri­­sin­she eksporttyq úlestiń kór­­set­­kishin kóterýdi kózdeıdi.

– Elbasy Nursultan Nazar­baevtyń 2018 jylǵy 5 qazan­daǵy Qazaqstan halqyna Jol­daýynda bul másele jóninde bıznes pen sala ókilderine jaýapty mindetter júktelgen. Biz Tuńǵysh Prezıdent tapsyrmasyna naqty ispen jaýap qaıtarýdy qajet dep taptyq. Qazir osy ónimge qyzyǵýshylyq tanytyp otyrǵan tutynýshylar elimizdiń óz ishinen de, shetelderden de tabylady. Biz mundaı tujyrymǵa tıisti marketıngtik zertteýler júrgizilgennen keıin kelip otyrmyz, – deıdi jabyq sý salynyp jatqan zaýyttyń dırektory Nurlan Qumarov. 

Atalǵan joba bıyl III toq­san­da paıdalanýǵa berilmek. Qazir analyq balyqtardyń ósip-ónýine arnalǵan qurylys bólik­teri tolyqtaı aıaqtalǵan. Oǵan afrıkalyq analyq jaıyn­dar  ákelindi. Balyqtardy azyqtan­dyrý men ósirý alańdarynyń qurylystary júrgizilýde. Jobanyń jalpy quny 1 mıllıard 535 mıllıon teńgeni qu­raıdy. Onyń 15 paıyzyna jeke ınvestorlyq qarajat tartylsa, 85 paıyzdyq qomaqty bóligi «Bıznestiń jol kartasy-2020» baǵdarlamasy sheń­berinde paıyzdyq mólsherdi sýbsı­dııalaý arqyly qarjylan­dyrylǵan. Zaýyt qurylysy tolyq aıaqtalǵan kezde 42 adam jańa jumys ornymen qam­tyl­maq. О́ndiriste jylyna 1,5-2 myń  tonna ónim shyǵarylady.

Jarqyn joba týraly materıal ázirleý kezinde Parlament Senatynyń depýtaty Muhtar Jumaǵazıevke jolyǵyp, oı-pikirin suraǵan edik.  Senator Aqtóbege kelgen saparynda zaýyt qurylysynyń qazirgi jaı-kúıimen tolyq tanysyp shyǵypty. Onyń aıtýynsha, «Murager» JShS qolǵa alǵan jo­ba otandyq ónim túrlerin kó­beı­týge súbeli úles qosa alady.

– Maǵan Aqtóbe oblysynyń aýyl sharýashylyǵyna qatysty máseleler jaqsy tanys. Sonyń ishinde balyq ósirý isiniń jaı-kúıine kelsek, óńirde ony kásip­ke aınaldyra bilgender jetki­likti. Al balyqty ósirýmen qosa óńdeý isi bul oblysta tuń­ǵysh ret qolǵa alynyp otyr, sonyń ishin­de jaıyn eti óńir turǵyn­da­ry úshin tańsyq taǵam deýge bo­­lady. Respýblıkada tuqy ba­­lyq pen bekireni jabyq sý aı­­­­dy­­nynda ósirýshiler úshin mem­­­le­ket tarapynan qarjylaı kó­mek kór­­setiledi. Mundaı sýb­sı­­­dııa­ny jaıyn ósirip, onyń etin óńdeý­shiler úshin de belgi­le­se artyq etpeıdi dep bilemin. Ba­lyq­tyń bul túriniń toǵanda tez ósetini de osyndaı ońtaıly she­­shim qabyldaýǵa sebep, – dedi senatar. 

Balyq pen bekire sharýa­shylyǵy degende oıymyzǵa eń aldymen Atyraý men Aqjaıyq, kári Kaspıı oralady. Endi mine, bul Aqtóbe aımaǵynda da qolǵa alyndy. Bir aıyrmashylyǵy, aldyńǵy atalǵan óńirlerde balyq negizinen tabıǵı sý aıdyndarynan aýlansa, bizdiń oblysta bul kásip álemdik úrdisterge saı jabyq sý aıdynynda júrgiziledi. «Murager» kompanııasy bastamashy bolǵan balyq ósirý men óńdeý isi erteń iri de irgeli kásiporynǵa, dámdi de sapaly balyq ónimderin shyǵaratyn alyp kombınatqa aınalatynyna senim mol. AQTО́BE