Mańdaı ter, taban aqysyn kóp ýaqyttan daýlap, ala almaı júrgender qatary da azaıar emes. Búgingi kúni kásiporyn-mekemelerdiń qaryzy 100 mıllıon teńgege jeteǵabyl. Jumysshy-qyzmetkerlerdi qysqartpaý, jalaqyny ýaqytyly tólep otyrý jóninde 12 myńǵa jýyq memorandým jasalǵanymen, túıindi problemalar jetip artylady.
«11 iri kásiporynmen 2018-2025 jyldar aralyǵyn qamtıtyn jol kartasy jasalǵan. Ujymdyq kelisim -shartpen eńbekkerlerdiń 94,7 prosenti qamtylǵan. Bıyl óndiriste oryn alǵan oqys oqıǵalardyń sany 55,6 prosentke tómendegen. Eń bastysy – jalaqyny ýaqytynda tóleý, onyń mólsherin arttyrý», dedi eńbek quqyǵy máseleleri talqylanǵan jıynda aımaq basshysy Qumar Aqsaqalov.
Qumar Irgebaıulynyń aıtýynsha, árbir jumysberýshi azyq-túlik pen kommýnaldyq qyzmet baǵasynyń joǵarylaıtynyn esepke alyp otyrýlary kerek. Keı aýdandarda bul is jóndi júrgizilmeıdi. Saldarynan qarapaıym adamdar az eńbekaqyǵa kún kórýge májbúr. Respýblıkadaǵy ortasha jalaqy kórsetkishi boıynsha teriskeı óńiri kósh sońynda keledi. Irili-usaqty 5 myńnan asa kásiporynda 200 myńdaı adam jumys isteıdi. Agrarly ólkede turǵyndardyń ál-aýqatyn jaqsartý–basty mindetterdiń biri.
Otyrysta sharýashylyq-kásiporyn basshylary tarapynan jumysshy- qyzmetkerlerge jasalyp otyrǵan áleýmettik qoldaýlar mysalǵa keltirildi. Máselen, «Mámbetov jáne K» KS-niń dırektory Erkebulan Mambetov eki aýyl turǵyndaryn qamqorlyqqa alǵan. Meńgeser men Bekseıit eldi mekenderinde búldirshinderge arnap shaǵyn ortalyq ashqan. 3 jyldyń ishinde jas mamandar úshin 8 baspana turǵyzylǵan. Bıyl taǵy 4 úı salynady. Turǵyndar tek kommýnaldyq qyzmetter úshin ǵana aqy tóleıdi.
Desek te, joldardy asfalttaýǵa, qalpyna keltirýge sharýashylyqtardyń kúshi jete bermeıdi.
«Bıyl 700 shaqyrym avtomobıl joldaryn jóndemekpiz. Biraq, trassany kóp uzamaı júk kólikteri buzyp tastaıdy. Osydan úsh jyl buryn Petropavl men Kókshetaý arasyndaǵy jol óte sapaly salynǵanyna qaramastan keı jerlerin iri júk kólikteri jaramsyz etip tastaǵan. Sondyqtan, mashınalardyń qansha júk tasymaldap jatqanyn esepteıtin arnaıy ramalar ornatý qajet», dedi ákim.