– Eki jyl ishinde biz sanamyzdyń qalaı jańǵyrǵanyn, oıymyzdyń qalaı toǵysqanyn, elimizdiń ótkenine qanshalyqty tereńdeı túskenimizdi endi sezinip otyrmyz, – dedi belgili jazýshy-dramatýrg Jabal Erǵalıev, – Elbasy óziniń eńbeginde ult tarıhyn zerdeleý, ony qalyptastyrý mindetterin qoıǵan bolatyn. Qazaqstannyń kıeli jerleri geografııasynyń jasalýynyń ózi tarıhymyzdy qurmetteýge baǵyttalǵan qadam.
Qazaqstannyń kıeli jerleriniń geografııasyna Aqmola oblysynan 10 nysannyń enýi jerlesterimiz úshin úlken maqtanysh. Demek, Alashtyń jaqsysy men jaısańynyń kindik qany tamǵan qasıetti topyraqta óshpes izi qalyp otyr. Ýaqyt lebimen sál kónergen dúnıeni jańasha jasartyp, eldiń rýhanı ıgiligine jaratý osy bastamamen baılanysty.
Oblystyq ishki saıasat basqarmasynyń bólim basshysy Kúnim Jumaenova óz sózinde baǵdarlama aıasynda atqarylǵan isti jipke tizgendeı etip baıandap berdi. Aımaqta óńirlik-jobalyq keńse, 44 «Rýhanı jańǵyrý» kabıneti jumys isteıdi. Ústimizdegi jyly oblystyq deńgeıdegi jobalardy iske asyrýǵa 18,181 mıllıard teńge qarajat qarastyrylyp otyr. Kókshetaý – Astana baǵytyndaǵy tas joldyń boıynda ult maqtanyshy – Aqan seri, Birjan sal, Úkili Ybyraı, Kenesary Qasymuly, Balýan Sholaq tárizdi tarıhı tulǵalardyń eskertkishteri ornatylmaq.
Forým barysynda Shoqan Ýálıhanov atyndaǵy Kókshetaý memlekettik ýnıversıtetiniń prorektory Amanaı Seıitqasymov, fılologııa ǵylymdarynyń doktory Berdibaı Shalabaı, tarıhı-mádenı murany qorǵaý jáne paıdalaný ortalyǵynyń bólim meńgerýshisi Jaslan Úkeev sóz sóılep, latyn grafıkasyna kóshý, tól tarıhymyzdy zerdeleý máselelerine baılanysty óziniń oryndy pikirlerin bildirdi.
Forýmǵa qatysýshylar «Uly dalanyń jeti qyry» taqyrybyndaǵy kórmeni, teatrlandyrylǵan qoıylymdy tamashalady. Ásirese Qazaqstan halqy Aqmola assambleıasy janyndaǵy Analar keńesi músheleriniń múbárak qolynan týǵan óner týyndylary kóztartarlyq. Teatrlandyrylǵan qoıylymdy kórgen kórermen kóne zamannyń kómbesin kókiregine kóshirip, tuńǵıyqtan nár alǵandaı.
Dál sol kúni oblys ortalyǵyndaǵy qalalyq kitaphanada «Rýhanı jańǵyrý» zaly men «Uly dalanyń uly tulǵalary» fotogalereıasy ashyldy.
Aqmola oblysy