Almatyda qala aýmaǵyn qamtyǵan aýqymdy seısmojattyǵý uıymdastyryldy. Tótenshe jaǵdaılar qyzmeti 7 balldyq jer silkinisi kezinde áreket etý tártibin pysyqtady. Oqý-jattyǵýǵa 1000-nan astam TJD qyzmetkeri men birqatar arnaıy tehnıka jumyldyryldy, dep jazady Egemen.kz.
Aldyn ala qala turǵyndaryna sırena dybysy estiletini jáne MassAlert júıesi arqyly habarlama jiberiletini eskertilgen. Degenmen keıbir turǵyndar eskertýdi estimegenin aıtqan.
Almatyda jer silkindi
Jattyǵý qala boıynsha 20 núktede ótkizildi. Negizgi praktıkalyq is-sharalar salynyp jatqan turǵyn úı kesheniniń aýmaǵynda uıymdastyryldy. Munda qutqarý qyzmetteri shartty jer silkinisiniń saldaryn joıý boıynsha birqatar áreketterdi pysyqtady.
«Áýe barlaý Mı-8 tikushaǵynyń kómegimen júrgizildi, qutqarýshylar parashıýtsiz ǵımarat tóbesine tústi, joǵarǵy qabattardan adamdardy qutqarý, úıindilerdi arshý jáne zardap shekkenderdi shyǵarý, sondaı-aq bıik ǵımarattardaǵy órtti sóndirý jumystary oryndaldy», dep habarlady TJM.
(Foto: TJM, seısmojattyǵý)
Sonymen qatar barlyq aýdannan zardap shekken turǵyndardy qabyldaý pýnktteri uıymdastyryldy. Almaty-2 stansııasynan azamattardy avtokólik jáne temirjol arqyly evakýasııalaý rásimi de pysyqtaldy. Qaýipti óndiristik nysandarda hımııalyq jáne bıologııalyq apattardy joıý ssenarııleri oryndaldy.
2024 jylǵy 23 qańtarda Almatyda 5 balldyq jer silkinisi bolyp, qala turǵyndary kútpegen dúmpýlerden oıanǵany málim.