Jańa ónerkásip ornynyń ashylýy Koreıa Respýblıkasynyń Prezıdenti Mýn Chje Inniń Qazaqstanǵa kelý saparymen tuspa-tus kelip otyr. Osy sapar aıasynda saıası, saýda-ekonomıkalyq, ınvestısııalyq jáne mádenı-gýmanıtarllyq saladaǵy áriptestik máselelerin talqylaý josparlanǵan. Almaty irgesindegi Indýstrııalyq aımaqta alǵashqy qazyǵy qalanǵan Hyundai Trans Kazakstan kólik zaýyty eki jaqty yqpaldastyq aıasynda júzege asýda. Zaýytty «Astana Motors» kompanııasy QR Indýstrııa jáne ınfraqurylymdyq damý mınıstrliginiń qoldaýymen salatyn bolady.
Qazirgi kezde zaýytty salý úshin Indýstrııalyq aımaqtan tolyqqandy ınfrqurylymy bar 25 gektar jer telimi bólingen. Zaýyt qurylysyna 25 mlrd teńge ınvestısııalanyp, jeti júzge jýyq jańa jumys oryndaryn ashý kózdelip otyr. Bul baǵytta qaraystyrylǵan qarjy kólemi 32,5 mln teńgeni quraıdy. Zaýytty salýǵa jeke qarajatpen qatar Qazaqstan Damý bankinen de qosymsha qarjy kózderi qarastyrylýda. Alǵashqy avtomobıldi shyǵarý 2020 jylǵa qaraı josparlanyp otyr.
Koreıadan kelgen delegasııaǵa jyly iltıpatyn bildirip, ońtústik astananyń ınvestısııalyq ahýalyna qatysty birqatar málimettermen tanystyrǵan Almaty ákimi Baýyrjan Báıbek ótken jyly qala ekonomıkasyna salynǵan ınvestısııa kólemi 10,5, al bıylǵy jylǵy qańtar-naýryz aılarynda 4,8 paıyzǵa artqandyǵyn jetkizdi. Onyń ishinde sheteldik ınvestısııa kólemi 21,4 paıyzǵa artyp, 111,1 mlrd. teńgege ulǵaıǵan. Al sońǵy on jylda Ońtústik Koreıadan Qazaqstanǵa salynǵan ınvestısııa kólemi 3,8 mlrd AQSh dollaryn quraıdy. Ońtústik Koreıamen aradaǵy taýar aınalymy 182 mln AQSh dollaryna jetse, bir ǵana Almaty qalasynda 61 birlesken kásiporyn jumys isteıdi.
Búginde aımaqta bızneske qolaıly jaǵdaı týǵyzý maqsatynda qajetti ınfrqurylym jasaqtalǵan. Osynyń negizinde qurylǵan Indýstrııalyq aımaqta quny 144 mlrd. teńge kóleminde 39 joba júzege asýda, onyń ishinde Hyundai Trans Kazakstan bar. Búginde bes kásiporyn belsendi bolsa, onyń ishinde Japonııanyń «Tokyo Rope Almaty» metall buıymdar zaýyty, Reseıdiń kabel ónimderin shyǵaratyn «KMK Investment» zaýyty jáne «BRB APK» jylyjaı kesheni bar. Atalǵan kompanııalar tarapynan 600 mln. kóleminde salyq tólenip, 800-den astam jumys oryndary ashylǵan.
Eki eldiń ekonomıkalyq saladaǵy yqpaldastyǵyna toqtalǵan Ońtústik Koreıa Saýda, ónerkásip jáne energetıka mınıstri Son Iýn Mo kólik zaýytyn salýǵa baılanysty kelisim sharttyń alǵashqy kelissózderi naýryz aıynda Seýl qalasynda ótken ekonomıkalyq máseleler boıynsha Qazaqstan-Koreıa komıtetiniń otyrysynda talqylanǵandyǵyn jetkizdi. Búginde Koreıa álemdik naryqta avtokólik qana emes, jartylaı daıyn ónimder, aqparattyq-kommýnıkasııalyq tehnologııalar jáne robototehnıka salasynda da kóshbasshy oryndardy ıelenip keledi. Endigi kezekte Qazaqstan aýmaǵynda salynǵan zaýyt ónimderi ishki naryqta ǵana emes Reseı, О́zbekstan men ózge de elderge eksporttalatyn bolady. Koreıa uzaq jyldarda jınaǵan tájirıbesimen bólisip, Qazaqstannyń ónerkásip salasyndaǵy senimdi áriptesine aınalmaq.
Mashına jasaý óndirisi Qazaqstannyń ındýstrııalandyrý baǵdarlamasyndaǵy basym baǵyttardyń biri ekendigin atap ótken QR Indýstrııa jáne ınfraqurylymdyq damý mınıstri Roman Sklıar búginde Koreıamen birlesken áriptestik aıasynda otandyq mashına jasaý salasynyń strategııasy ázirlengendigin jetkizdi. Kommersııalyq maqsatta qolǵa alynǵan bul jobaǵa memleket tarapynan qoldaý kórsetilip otyr. Jańa zaýyt bolashaqta ónim kólemin ulǵaıtýǵa múmkindik berýmen qatar Ortalyq Azııadan ózge de elderge eksporttyq áleýetin arttyryp, Koreıanyń mashına jasaý óndirisindegi ozyq tájırıbeleri otandyq ónerkásip salasynyń damýyna tyń serpin beredi. Elimizde búginde SsangYong, Hea, Hyundai álemdik tanymal brendterdiń óndirisi artyp keledi. О́tken jyly elimizde 32000 avtokólik óndirilgen.
Astana Group Prezıdenti Nurlan Smaǵulov jańa zaýyt irgesiniń qalanýy elimizdiń avtokólik óndirisi úshin aıtýly oqıǵa dep atap ótti. Hyundai otandyq mashına shyǵarý naryǵyna jańa tehnologııalyq múmkindik bere otyryp, burynǵylaryna múldem uqsamaıtyn zamanaýı úlgilerimen erekshelenedi. Ári taıaý bolashaqta Eýrazııalyq ekonomıkalyq odaq elderine joǵary sapaly ónim eksporttaý múmkindigi jasalady. Al mashına jasaý salasyndaǵy maman máselesi Reseımen kelisimder aıasynda júzege asatyn bolady.
Búginde atalǵan kompanııa elimiz naryǵyna 11 avtomobıl brendin usynyp otyr ári Hyundai jeńil jáne kommersııalyq tehnıkasynyń resmı dıstrıbıýtory bolyp tabylady. 2011 jyldan Hyundai kommersııalyq tehnıkasyn qurastyratyn avtomobıl qurastyrý kásiporny iske qosylyp, Reseıge, Belorýs jáne Tájikstan elderine eksporttala bastydy. Qazaqstandaǵy Hyundai eń kóp satylatyn avtomobılderdiń úshtigine kiredi.
Jańa kásiporynnyń qýaty birinshi kezeńde jylyna 30 myń, al ekinshisinde 45 myń avtomobıl shyǵarý múmkindigine ıe. Sapaly ári baǵasy jaǵynan qoljetimdi Hyundai markaly jeńil kóliktermen otandyq naryqty ǵana emes, eldiń eksporttyq áleýetin arttyrýdyń múmkindigi zor. Zaýytta Hyundai brendiniń barlyq sándik úlgileri qurastyrylmaq. Birinshi kezeńde Hyundai jelisi jeńil modelderiniń tolyq sıklin, keıinnen Creta modelderin shyǵarý jelisi iske qosylatyn bolady.
Zaýyttyń quramyna dánekerleý sehy, boıaý sehy, qurastyrý sehy, plastık panelderdi shyǵarý sehy men sapany baqylaý bólimi kiredi. Zaýyt Ońtústik Koreıa jáne Japonııada óndirilgen jańa tehnologııalarmen jabdyqtalatyn bolady.