Eýropaǵa jetýge talpynǵan mıgranttardyń sapary taǵy da adam shyǵynymen aıaqtaldy. Lıvııa men Aýǵanstannan shyqqan adamdardyń qaıyqtary apatqa ushyrap, ondaǵan adam kóz jumdy, birnesheýi aýyr jaǵdaıda aýrýhanaǵa jetkizildi. Bul týraly aqparatty euronews.com saıty málim qyldy, dep habarlaıdy Egemen.kz.
Sársenbi kúni Lampedýza araly mańynda mıgranttar mingen qaıyqtan keminde 19 adamnyń máıiti tabyldy, taǵy 5 adamnyń jaǵdaıy óte aýyr. Qutqarýshylar bul kemeni halyqaralyq sýlarda, araldan shamamen 160 km qashyqtyqta anyqtaǵan. Qaıyqta barlyǵy 77 adam bolǵan.
Aldyn ala málimet boıynsha, keıbir jolaýshylar qutqarýshylar jetkenge deıin-aq sýyqtan qatyp qalý jáne qaıyq túbine jınalǵan kómirsýtek býlarynan ýlaný saldarynan kóz jumǵan.
Lampedýza – Soltústik Afrıkadan Jerorta teńizi arqyly Eýropaǵa ótetin negizgi baǵyttardyń biri. Alaıda bul jol asa qaýipti. Halyqaralyq kóshi-qon uıymy deregine sáıkes, bıyldyń ózinde Ortalyq Jerorta teńizinde 624 adam qaza tapqan nemese iz-túzsiz joǵalǵan, al ótken jyly bul kórsetkish 1300-den asqan. Italııa Ishki ister mınıstrliginiń málimetinshe, jyl basynan beri el jaǵalaýyna 6 117 mıgrant jetken.
Túrkııa Iran elinen keletin mıgranttardy qabyldaıdy
Osy kúni taǵy bir qaıǵyly oqıǵa Egeı teńizi aýmaǵynda tirkeldi. Mýgla provınsııasy jaǵalaýynda mıgranttar mingen úrlemeli qaıyq aýdarylyp, taǵy 19 adam qaza tapty, onyń ishinde 1 bala bar.
Túrkııa jaǵalaý kúzetiniń málimetinshe, qaıyqtaǵy adamdar patrýldiń birneshe ret jasaǵan eskertýin elemeı, joǵary jyldamdyqpen qashýǵa tyrysqan. Sonyń saldarynan keme aýdarylǵan. Oqıǵa ornynan keminde 20 adam qutqaryldy.
Mýgla provınsııasynyń gýbernatory Idrıs Akbyık barlyq mıgranttardyń Aýǵanstan azamattary ekenin málimdedi. Olar Grekııa araldaryna jetýdi kózdegen.
Jalpy, Grekııa men Italııa – Taıaý Shyǵys, Afrıka jáne Azııadaǵy qaqtyǵystar men kedeılikten qashqan adamdar úshin Eýropaǵa kiretin negizgi qaqpa. Alaıda olardyń kóbi ashyq teńizge jaramsyz shaǵyn qaıyqtarmen saparǵa shyǵyp, jolda qaza taýyp jatyr.
Qazaqstanǵa eńbek mıgranttary qaı elden kóp keledi