Osy sharaǵa oraı oblystyq tarıhı-ólketaný murajaıynda «Qazaq ǵylymynyń temirqazyǵy» degen taqyrypta dóńgelek ústel uıymdastyrylyp, oǵan Baıanaýyl jáne Jezqazǵannan kelgen qonaqtar, Qanysh Sátbaevtyń urpaqtary, JOO ǵalymdary men oqytýshylary, mádenıet qaıratkerleri, qoǵamdyq uıymdardyń músheleri jáne «Ortalyqqazjerqoınaýy» geologııalyq murajaıynyń qyzmetkerleri qatysty.
Dóńgelek ústel barysynda Qazaqstan Respýblıkasy Ulttyq Ǵylym akademııasynyń akademıgi, professor Arstan Ǵazalıev, oblystyq tarıhı-ólketaný murajaıynyń dırektory Erjan Nurmaǵanbetov ǵulama ǵalymnyń mereıtoıy aıasynda istelip jatqan ıgi sharýalar týrasynda áńgime qozǵap, Qanysh Imantaıulynyń qazaq halqyna sińirgen eńbeginiń mán-maǵynasy men qadir-qasıeti ýaqyt ótken saıyn arta túsetinin atap ótti.
Sondaı-aq, shara aıasynda tarıhı-ólketaný murajaıy ǵımaratynyń aldyna Ulytaý aýdanyndaǵy orman sharýashylyǵynan jetkizilgen úsh qaıyń kósheti otyrǵyzyldy. Onyń birinshisin Baıanaýyldan kelgen qonaqtar men ǵalymnyń týystary otyrǵyzsa, ekinshisin Ulytaý men Qarsaqbaı turǵyndary ekti. Al úshinshi qaıyń kóshetin otyrǵyzý qaraǵandylyqtardyń enshisine tıdi.
«Ǵasyrdyń bıik tulǵasy» kórmesiniń Jezdi kentinde ornalasqan M. Tóregeldın atyndaǵy taý-ken jáne balqytý isi tarıhy murajaıy men akademık Q.Sátbaevtyń Baıanaýyl memorıaldyq murajaıymen birlesip uıymdastyrylǵanyn aıta ketken jón.
Kórmege qoıylǵan 200-den astam eksponattyń arasynda ertoqym, kıim-keshek, mıneraldar kolleksııasy, sondaı-aq ǵalym-geologtyń ǵylymı jumystary, qoljazbalar men marapattary, akademıktiń dombyrasy, fotomaterıaldar, kitaptar, shapan, Jezqazǵan mysy sııaqty jádigerler bar. Sondaı-aq, ekspozısııa sóresinen Álkeı Marǵulannyń ǵulama ǵalym úshin arnaıy tapsyryspen jasatqan myltyǵy da oryn alǵan. Á.Marǵulan qarýdy murajaıǵa 1999 jyly tapsyrypty.
Mańyzdy mádenı sharanyń sońyna taman akademık Qanysh Sátbaevtyń týysy Kúltaı Baıazıtqyzy tarıhı-ólketaný murajaıynyń ujymyna áýlet atynan alǵys aıtty.
«Ǵasyrdyń bıik tulǵasy» kórmesi sáýir aıynyń 30-na deıin jalǵasady.
Qaraǵandy oblysy