«Elbasy Nursultan Nazarbaev 2018 jyldyń naýryz aıynda 75 myń oryndyq stýdent jataqhanalaryn salýdy tapsyrdy. О́tken jyldyń ózinde oqý oryndary men jergilikti bıýdjet esebinen 3 myńnan astam oryn engizildi. Osy jobaǵa jeke ınvestorlardy keńinen tartý maqsatynda Ulttyq kásipkerler palatasymen birge memlekettik-jekeshelik áriptestikke negizdelgen arnaıy mehanızm júzege asyrylýda. Normatıvtik-quqyqtyq baza qalyptastyrylyp, qarjy kólemi bekitildi. Jataqhana qurylysymen aınalysatyn kásipkerlerge ınjenerlik-kommýnıkasııalary daıyn jer telimderi berilip, banktik nesıeniń 7 paıyzy memleket esebinen sýbsıdııalanady», dedi Kúlásh Shámshıdınova.
Onyń aıtýynsha, jataqhana qurylysyna qoıylatyn talaptar jeńildetilgen. «Bul sharalar ınvestorlardyń shyǵyndaryn qysqartyp, qurylystyń jalpy qunyn tómendetýge múmkindik beredi. Jataqhana qoldanysqa berilgennen keıin onyń ıesine 8 jyl qatarynan memlekettik tapsyrys ornalastyrylatyn bolady. Sonymen birge, ınvestordyń osy ǵımaratta ashana, jattyǵý zaly jáne ózge de turmystyq qyzmetterdi ornalastyrý arqyly qosymsha kiris tabýyna múmkindik berilgen», dedi ol.
Mınıstrliktiń málimetine súıensek, Nur-Sultan qalasynda jataqhana qurylysy boıynsha ákimdik tarapynan sýbsıdııalaý engizilgen.
«Búgingi tańda 19 myńnan astam orynnyń engizilýin qamtamasyz etetin 43 joba iske asyrylýda. Atalǵan jobalar aıasynda aǵymdaǵy jyldyń ózinde josparlanǵan 5 myńnyń ornyna 9196 oryn engizilip, jospar 184 paıyzǵa oryndalady dep kútilýde», dedi ol.
Jataqhana qurylysy boıynsha aldyńǵy qatarda Nur-Sultan, Almaty, Shymkent qalalary men Jambyl oblysy tursa, al SQO, Aqtóbe, Túrkistan oblystarynda jumys qarqyny tómen bolyp otyr.
«Aǵymdaǵy jyldyń kórsetkishine qol jetkizý úshin birqatar jumys atqaryldy. Degenmen kelesi jyldyń josparynyń oryndalýy alańdatyp otyr. Osyǵan oraı kelesi sharalardy júzege asyrýǵa qoldaý kórsetýdi suraımyz. Birinshi - óńirlerde barlyq oqý oryndary kórsetilgen jataqhana salýdyń tolyq kestesin bekitý. Ekinshi - qymbat turatyn jobalyq-smetalyq qujattardy ázirleýdi toqtatý. Úshinshi - jer máselesin ońtaıly sheshý maqsatynda memlekettik joǵary oqý oryndaryn kommersııalyq emes aksıonerlik qoǵam etip qaıta uıymdastyrý jumysyn jedeldetý. Tórtinshiden, osy jobany iske asyrý barysynda seısmıkaǵa qatysty máseleler kóterildi. Osyǵan baılanysty normatıvke seısmıkany eskeretin koefısıentti qarastyrý», dedi K. Shámshıdınova.