Saılaý merzimine az ǵana ýaqyt qaldy. Sarapshylardyń pikirinshe, kandıdattardyń jer-jerlerdi aralap óz ustanymdaryn, saılaýaldy baǵdarlamalaryn jurtshylyqqa tolyqqandy jetkizýine ýaqyt tar. Sondyqtan Memlekettik aqparat kózderi bastaǵan baspasóz quraldary úmitkerlerdiń únin halyqqa jetkizýde barynsha belsendilik tanytýǵa tıis. Osy rette salmaǵy aqparat quraldarynan kem túspeıtin áleýmettik jelilerdi de bul jumystarǵa ońynan paıdalanǵan jón. Pikirtalastar uıymdastyrýdyń, úmitkerlerdiń maqsat-mindetterin tanytatyn beınerolıkterdi kóbirek usynýdyń mańyzdylyǵy zor.
– Bárimiz kórip otyrǵandaı el tarıhynda tuńǵysh ret Prezıdenttik saılaýǵa áıel adam túskeli otyr. Aıtpaǵymyz, «Aqjol» partııasynan synǵa túsetin Danııa Espaeva týraly. Bul qoǵamnyń birshama jańarǵanyn, áıel zatyna degen kózqarastyń ózgergenin kórsetedi. Biz muny bolashaqta áıel azamattardyń saıası naýqandarǵa aralasyp, belsendilik tanytýyna jol ashatyn jaqsy múmkindik dep esepteımiz. Basty másele, ómirge jańa urpaq keldi. Qoǵamnyń etnodemografııasy ózgerdi. Toqsanynshy, 2000-shy jyldardaǵy erejelerdi bilmeıtin, olardy moıyndaı bermeıtin táýelsizdik urpaqtary boı kórsetti. Olardyń saılaý men saılaý ınstıtýtyna degen kózqarasy qandaı degen saýal týyndaıdy. Biz olardyń saılaý mádenıetin qalyptastyrýǵa, jalpy saıasatqa aralasýyna múmkindik berýimiz kerek. Bılik óziniń jalǵyz kandıdatyn usynyp birligin dáleldedi. Qoǵamǵa bárimiz biraýyzdan monalıtti túrde saılaýǵa shyqtyq degen naqty sıgnal berildi. Qoǵamnyń saıası mádenı jaýapkershiligi bıik bolýy kerek. Bul meniń memleketim. Bul memlekettiń ishinde bolyp jatqan dúnıeler maǵan tikeleı qatysty degen paıym, fılosofııa, saıası mádenıet túsinik bar ma, joq pa degen máseleler týyndaıdy. Ádil saılaý osyny qalyptastyrady. О́kinishke oraı, bizde bul saılaý ne sheshedi, men qatysqannan ne ózgeredi degen qoldy bir silteýshilik bar. Eń qaýipti úderis osy. Saılaýda úıde jatyp qalý azamattardy memlekettiń denesinen ajyratyp qalatyn dúnıe sekildi. Biz bir aǵzamyz. Qoǵam da. Memleket te. Elimizde bolyp jatqan ár ózgeriske bizdiń qatysymyz bar degen máseleni aıtý, qalyptastyrý asa mańyzdy, – deıdi saıasattanýshy Aıdos Sarym.
Konferensııany júrgizgen Saıası ǵylymdardyń doktory Esenjol Alııarov memlekettiń damý jolynda prezıdenttik saılaýdyń atqaratyn róli joǵary ekenin, el erteńin synǵa salǵan taǵdyrsheshti sátte otandastarymyz tutastaı belsendilik tanytý qajettigin aıtady. Osy pikirge qosylǵan saıasattanýshylar ekonomıka, áleýmet syndy memlekettiń negizgi tiregi sanalatyn salalardy óristetýge kúsh salatyn kóshbasshy ǵana saıası turaqtylyqty odan ári jalǵaı alatynyn jetkizdi.
Jınalǵandar, halyq úmitkerlerden memleketti órkendetýge baǵyttalǵan naqty qadam kútedi. Eń bastysy kópshiliktiń tańdaýy syn saǵatta el múddesin qorǵaı alatyn kandıdattar men tulǵalarǵa túsýi kerek degen pikirge toqaılasty.
ALMATY