Memleket basshysy Jetisý jeriniń tarıhı tamyry tereń ekenin atap ótip, oblystyń qaıta jańǵyrǵan Uly Jibek jolynyń boıynda ornalasýy óńirdi damytý úshin jańa múmkindikterge jol ashatynyn aıtty.
– Búginde Jetisý aımaǵy joǵary qarqynmen damyp keledi jáne aýyl sharýashylyǵy óndirisi kólemi jóninen kósh basynda. О́ńirdegi óńdeý ónerkásibiniń úlesi elimizdegi eń joǵary – 86 paıyz. Almaty oblysy adam kapıtaly jóninen Qazaqstan boıynsha aldyńǵy qatarda. Olar – elimizdiń damýyna óz úlesin qosyp jatqan ózderińiz sııaqty jas mamandar, kásipkerler, aqyn-jazýshylar men eńbek ujymdarynyń ókilderi, – dedi Qasym-Jomart Toqaev.
Qazaqstan Prezıdenti jedel sheshim qabyldaýdy qajet etetin máselelerge nazar aýdardy.
– Basqa óńirlerdegi sııaqty Almaty oblysynda burynǵysha aýyzsýmen qamtamasyz etý problemasy bar. Ákimdik eldi mekenderdiń perspektıvti damýyn esepke alyp, sýmen qamtý júıesiniń qurylysy men qaıta jóndeý jóninde keste jasap, jumystardy júrgizýi qajet, – dedi Memleket basshysy.
Qasym-Jomart Toqaev apatty jaǵdaıdaǵy jáne úsh aýysymda oqytatyn mektepterdiń problemalaryna toqtalyp, Úkimetke jáne oblys ákimdigine 2021 jylǵa deıin mektep qurylysyna qatysty máseleni sheshýdi tapsyrdy.
– 14 mekteptiń qurylysyna 2018-2019 jyldary respýblıkalyq bıýdjetten 15,4 mıllıard teńge bólindi. Biraq, aımaq taǵy da 20 mektepke zárý bolyp otyr. Bul úshin 2020-2021 jyldary 29 mıllıard teńge bólý kerek. Bul meniń tapsyrmam, – dedi Qazaqstan Prezıdenti.
Memleket basshysy oblysta dárigerlerdiń jetispeıtindigin atap ótip, medısınalyq qyzmet kórsetý sapasynyń tómendegenin aıtty. Sonymen qatar, jas mamandardy qaladan aýylǵa kóshirý úshin yntalandyryp, «Dıplommen aýylǵa» baǵdarlamasynyń aıasynda jas kadrlardy jumysqa qabyldaý úshin jaǵdaı jasaý kerektigin aıtty.
Sonymen qatar, Qasym-Jomart Toqaev áleýmettik jaǵdaıy tómen turǵyndardy baspanamen qamtý máselelerine erekshe nazar aýdardy.
– Baspana kezeginde áli kúnge deıin 41 myń adam tur. Onyń 11 myńy – birinshi kezekte máseleleri sheshilýi tıis turmysy tómen kópbalaly otbasylar. Jas mamandar men jas otbasylar úshin turǵyn úı qurylysyn belsendi túrde júrgizý qajet. Ákimdik jas mamandardy baspanamen qamtý úshin ózge óńirlerdiń úlgisimen «7-20-25» baǵdarlamasy boıynsha alǵashqy jarnany jabatyn turǵyn úı sertıfıkattaryn berý tetigin iske qosýy qajet, – dedi Qazaqstan Prezıdenti.
Memleket basshysy aýyl sharýashylyǵyna qajetti jerlerdi maqsatty paıdalaný, sýarmaly júıelerdi modernızasııalaý men ırrıgasııalardy qalpyna keltirý sııaqty máselelerge toqtaldy. Sonymen qatar, jer ýchaskelerin bólý jáne olardy tıimdi paıdalanýǵa baqylaýdy qamtamasyz etý isinde oblystyń agroónerkásip keshenin qoldaý úshin kóliktik qyzmetterge tarıfterdi tómendetý kerektigin atap ótti.
– Taǵy bir mańyzdy másele – Jetisýdyń týrıstik ındýstrııasyn damytý. О́ńir elimiz úshin týrızm ortalyǵy retinde keńinen tanyldy. Bul jerde týrısterdi tartatyn negizgi oryn – emdik qasıetimen aty shyqqan Alakól kóli. О́tken jyly ǵana 2 mıllıon adam demalyp, týrıster sany 20 paıyzǵa ósken. Alaıda qyzmet kórsetý deńgeıi, kóliktik, qonaq úı ınfraqurylymy syn kótermeıdi. Úkimetke ákimdikpen birlesip, shıpajaı aımaǵynyń ınfraqurylymyn jaqsartý úshin keshendi sharalar qabyldaýdy tapsyramyn, – Qasym-Jomart Toqaev.
Qazaqstan Prezıdenti aımaqtyń kólik-logıstıkalyq áleýetine erekshe toqtalyp, jergilikti joldardyń sapasyn arttyrýdyń mańyzdy ekenin atap ótti.
– Almaty oblysy – strategııalyq aımaq. Elimizdiń mańyzdy kólik toraby men logıstıkalyq ortalyǵy bolý úshin oblystyń áleýeti jetkilikti. «Batys Eýropa – Batys Qytaı» avtomobıl magıstrali qurylysynyń aıaqtalýyna baılanysty Almaty oblysy Azııa men Eýropanyń arasyn jalǵaıtyn kólik qozǵalysy úshin qaqpaǵa aınaldy. Sonymen qatar, oblys joldarynyń 22 paıyzy syn kótermeıtin bolǵandyqtan, bul ózekti másele bolyp otyr. Oblys ákimine atalǵan máselemen júıeli túrde aınalysyp, tozyǵy jetken joldardy birtindep qalpyna keltirýdiń 2025 jylǵa deıingi josparyn ázirleýdi tapsyramyn, – dedi Memleket basshysy.
Qasym-Jomart Toqaev kezdesý sońynda memlekettik nagradalar eńbek adamdaryna, ásirese ǵalymdar, qurylysshylar, qarapaıym jumysshylarǵa berilýi kerek ekenin atap ótti.
Qazaqstannyń áleýmettik-ekonomıkalyq jáne mádenı damýyna úles qosqany úshin oblystyq ardagerler keńesiniń tóraǵasy E.Kelemseıitti, «Hılnıchenko ı K» basqarma basshysy V.Hılnıchenkony, «Almaty kópsalaly aýrýhanasynyń» bólim meńgerýshisi E.Kenjebekovti jáne №40 orta mektebi dırektorynyń orynbasary A.Ibraımovany alǵys hattarmen marapattady.