Qasym-Jomart Toqaevtyń saılaýaldy respýblıkalyq qoǵamdyq shtaby Pavlodar oblysyna baryp, aımaq turǵyndaryn kandıdattyń baǵdarlamasymen tanystyrdy. Nur Otan partııasy Tóraǵasynyń birinshi orynbasary Máýlen Áshimbaev bastaǵan delegasııa Dostyq úıinde jergilikti etnomádenı birlestikter, úkimettik emes uıymdar jáne zııaly qaýym ókilderimen júzdesti.
«Prezıdenttikke kandıdat Qasym-Jomart Toqaev óz jumysynda Elbasy Nursultan Nazarbaev negizin qalaǵan ultaralyq kelisim qaǵıdattaryn iske asyrýdy jalǵastyrady. Tózimdilik, azamattyq álem men turaqty ultaralyq dıalog – Tuńǵysh Prezıdent, Nur Otan partııasy Tóraǵasynyń baǵyty aldaǵy ýaqytta da basymdyqta bolady. Qazaqstan Elbasy saıasatynyń mańyna toptasýynyń arqasynda búkil álem moıyndaǵan zor nátıjelerge qol jetkizedi. Bizdiń kandıdat – Qazaqstandaǵy ultaralyq kelisimdi nyǵaıta túsýdegi Elbasynyń isin jalǵastyra alatyn tulǵa», dedi M.Áshimbaev.
Sonymen qatar Qyzylordada «Nevada – Semeı» qoǵamdyq birlestiginiń músheleri saıası naýqanǵa beıjaı qaramaıtyndaryn bildirip, Syr halqyn elimizdegi jetekshi saıası kúsh, Tuńǵysh Prezıdentimizdiń senimdi serigi, kandıdat Q.Toqaevty biraýyzdan qoldap, daýys berýge shaqyrǵan úndeý jarııalady. Úndeý mátininde: «Qasym-Jomart Kemeluly – dúnıe júzine málim, dıplomatııalyq qyzmettiń barlyq satysynan ótip, Birikken Ulttar Uıymynda elimizdiń ókili bolǵan tájirıbeli saıasatker. Qıyn ekonomıkalyq kezeńde Premer-Mınıstr qyzmetin atqarǵan. Halyqtyń ómir súrý sapasy men tabysyn qalaısha arttyrý kerektigin jaqsy túsinetin janashyr. О́ziniń «Sabaqtastyq, Ádildik, О́rleý» saılaýaldy baǵdarlamasynda Qasym-Jomart Toqaev ár qazaqstandyq azamatqa teń múmkindik beriletinine basa nazar aýdarǵan. Bul ustanym qoǵamdyq ómirdiń barlyq salalaryn qamtıdy», delingen.
* * *
«Aq jol» demokratııalyq partııasynan kandıdat Danııa Espaevanyń saılaýaldy shtaby Aqmola oblysynyń Ereımentaý aýdanynda úgit-nasıhat kezdesýlerin ótkizdi. №8 Agrotehnıkalyq kolledjde shtab jetekshisi Azat Perýashev oqytýshylar men stýdentterdi óz kandıdatynyń saılaýaldy baǵdarlamasymen tanystyrdy. Onda el ekonomıkasynyń negizi retinde kásipkerlikti qoldaý jónindegi sharalar kesheni usynylady.
Oqý ornynda aýyl sharýashylyǵy salasyndaǵy bolashaq mamandardy, sondaı-aq tiginshilerdi, qurylysshylar men slesarlardy daıyndaıdy. Mamandyqtardyń bári eńbek naryǵynda suranysqa ıe. Sondyqtan munda oqyp shyqqan árbir mamannyń bolashaqta óz isin ashýǵa múmkindigi zor. Kandıdat baǵdarlamasynda iri kásiporyndar men shaǵyn jáne orta bıznes úshin nesıelerdiń paıyzyn tómendetý, sondaı-aq qorlar arqyly balamaly, banktik emes qarjylandyrýdy damytý basshylyqqa alynǵan. D.Espaeva basym salalar, onyń ishinde aýyl sharýashylyǵy úshin qosylǵan qunǵa salynatyn salyqty tómendetýdi usynady. Osy bastamalarmen Ereımentaý aýdany Maltabar aýylynyń turǵyndary tanysty.
Búginde kandıdattyń respýblıkalyq shtabynan bólek, partııanyń aımaqtyq fılıaldaryn qosqanda, barlyǵy 17 shtab bar. Olardyń quramyna aımaqtyq belsendilermen birge jýrnalıster, blogerler, úgitshiler kiredi. Saılaýaldy naýqanda úgit materıaldaryn taratý, josparlanǵan is-sharalardy uıymdastyrý jumystary qyzý júrip jatyr.
* * *
Prezıdenttikten úmitker Tóleýtaı Raqymbekovtiń shtaby Nur-Sultan qalasynda «Aýyl naqyshtary» atty fotokórme ótkizdi. «Han Shatyr» saýda, oıyn-saýyq ortalyǵynda saltanat qurǵan kórmede qala turǵyndary shalǵaıdaǵy aýyl-aımaq turmysynan syr shertetin sýretterdi tamashalady. Kópshilik nazaryna usynylǵan týyndylarda eldi mekenderdiń qazirgi turmys-tirshiligi, bet-beınesi jáne áleýmettik máseleleri kórinis tapqan. Osy is-shara aıasynda kandıdattyń saılaýaldy baǵdarlamasy da tanystyryldy.
«Aýyl» halyqtyq-demokratııalyq patrıottyq partııasy ortalyq apparatynyń jetekshisi Qýanysh Seıitjanov: «Bul fotosýretterden aýyl tirshiligin jan-jaqty kórýge bolady. Bári bar: aýyldaǵy tirlik, balalardyń ómiri, úlkender men jastardyń arasyndaǵy qarym-qatynas, keıbir áleýmettik máseleler. Árıne, osy fotosýretterdiń negizgi jıynynda, mazmunynda bizdiń kandıdatymyzdyń baǵdarlamalyq maqsattarymen úlken sáıkestik, úılesim bar», dedi.
Elordadaǵy bul kórmege respýblıkalyq jarysta úzdik atanǵan týyndylar qoıyldy. Iаǵnı, osy maqsatta birer aı buryn «Aýyl» partııasy arnaıy baıqaý jarııalap, oǵan elimizdiń barlyq aımaǵynan 300-den asa fotosýret kelip túsken edi. Prezıdenttik úmitker Tóleýtaı Raqymbekovtiń saılaýaldy baǵdarlamasy osyndaı aýyldardaǵy turmysty jaqsartyp, áleýetin arttyrýǵa baǵyttalǵan. Buǵan qosa shet jaqtaǵy eldi mekenderdegi rýhanı qundylyqtardy saqtaý, ulttyq dástúrdi dáripteý jáne jastardy júıeli jumysqa tartý sııaqty máselelerdi de qamtıdy. Kandıdattyń ózi jaqyn kúnderi óńirlerge jasaıtyn saparynda saılaýaldy baǵdarlamasyn keńinen tanystyrmaq.
* * *
Qazaqstan Kommýnıstik halyq partııasynyń atynan prezıdenttikke kandıdat Jambyl Ahmetbekovtiń senim bildirilgen ókili Beısenbaı Májıtov Stepnogor qalasyndaǵy «Selıngormash» mashına jasaý zaýytynyń ujymymen kezdesti. Zaýyt basshylary Aqmola oblystyq saılaýaldy shtabynyń jetekshisine óndiristik seh jumysyn tanystyryp, kásiporynnyń ónimderin kórsetti.
Budan keıin B.Májıtov jınalǵandarǵa kandıdattyń saılaýaldy tuǵyrnamasy týraly baıandady. «Qazaqstan Kommýnıstik halyq partııasy» buqaranyń jaqtaýshysy retinde 15 jyldan beri saıası-qoǵamdyq, áleýmettik-ekonomıkalyq máselelerdiń sheshilýine yqpal etip keledi. Biz shıkizatqa táýeldi emes ekonomıkanyń damyǵanyn qalaımyz. Osy arqyly básekege qabiletti bolýǵa umtylamyz. Batystyń yqpaly men jalǵan qundylyqtarynan bas tartý, kedeılikpen kúres, kórshi eldermen ekonomıkalyq ıntegrasııa jáne qoldanysqa ádiletti salyq salý júıesin engizý arqyly jarqyn bolashaqqa qadam jasaýǵa bolatynyna senemiz», dedi ol. Kezdesýge kelgen qala turǵyndary B.Májıtovke ózderin tolǵandyrǵan máselelerin aıtyp, qymbatshylyqqa, zeınet jasyna, turǵyn úıge, áleýmettik kómek pen járdemaqyǵa qatysty saýaldaryna naqty mysalmen jaýap aldy.
Al Nur-Sultan qalasynda partııanyń qoǵamdyq shtaby óz kandıdattaryn qoldaýǵa shaqyrǵan avtosherý uıymdastyrdy. Qyzyl tústi jalaýlatqan, dabyldy kólikter shebi Qonaev pen Máńgilik el kósheleriniń qıylysqan tusynan jol bastady. Elordalyq shtabtyń jetekshisi Nurdáýlet Orazhanov bul is-shara kólik júrgizýshileri men kóshedegi jurttyń nazaryn erekshe aýdaratynyn, sol arqyly óz kandıdattarynyń saılaýaldy tuǵyrnamasymen tanysýǵa shaqyrǵandaryn jetkizdi. Qoǵamnyń ıgiligi úshin adal eńbekke úndegen kommýnısterdiń tizgindegen kólikteri Esildiń sol jaǵalaýynan oń jaqqa qaraı oıysyp, sońynda shahardyń shet aımaqtaryn da aralady. Shtab ókilderi mundaı avtosherý buryn da ótkizilgenin, sodan keıin turǵyndar baılanysqa shyǵyp, maqsat-mindetterine qyzyǵýshylyq tanytqandaryn aıtady.
* * *
Kásipodaqtar federasııasy atynan prezıdenttikke kandıdat Amangeldi Taspıhov respýblıkalyq qoǵamdyq saılaýaldy shtabynyń jetekshisi Baqytjan Ábdiraıymmen birge Qyzyljar óńirine saparlap baryp, kásipodaq belsendilerimen kezdesti. A.Taspıhov ózine qoldaý kórsetken soltústikqazaqstandyqtarǵa rızashylyǵyn bildirip, saılaýaldy tuǵyrnamasynyń basym baǵyttaryn tanystyrdy. Onda jumysshylardyń múddesin qorǵaý, qalypty eńbek jaǵdaıyn jasaý, eńbek mıgrasııasyn, ishki kóshi-kon úrdisin retteý sııaqty máselelerge mańyz berilgen.
Buǵan qosa kandıdatty nasıhattaý is-sharalary óńirlerde jalǵasty. Sonyń biri kandıdattyń Aqtóbe oblysyndaǵy senim bildirilgen adamy statıstıka departamentiniń ujymymen kezdesti. Jıynda kásipodaq músheleri úmitker tuǵyrnamasynda kóterilgen qaýipsiz eńbek jaǵdaıyn jasaý, jumysshylardyń eńbek quqyn qamtamasyz etý, jumys berýshilerdiń jaýapkershiligin arttyrý syndy basty baǵyttar týraly habardar boldy.
Sondaı-aq Túrkistan oblysy boıynsha qoǵamdyq shtabtyń basshysy Berik Bekjanov Ordabasy aýdanyndaǵy mádenıet úıinde jáne kitaphanada kezdesýler ótkizdi. Bilim, sport salalarynyń ókilderi men memlekettik qyzmetkerler, bıýdjettik sala ókilderi bas qosqan alqaly jıynǵa 250 saılaýshy qatysty. Basqosýǵa arnaıy kelgen azamattar Qazaqstan kásipodaǵynyń qyzmetin jandandyrý jolyndaǵy tyń múmkindiktermen tanysyp, qoldaý bildirdi jáne eńbek qaýipsizdigi men ujymdyq sharttyń áleýmettik mańyzdylyǵyna erekshe den qoıdy. Kásipodaqtardyń ustanyp otyrǵan kózqarastary men naqty qadamdary saılaýshylar tarapynan qoldaý tabatynyna senim bildirdi.
* * *
«Ult taǵdyry» ulttyq-patrıottyq qozǵalysynan prezıdenttikke kandıdat Ámirjan Qosanov keshe Facebook, Youtube, Instagram áleýmettik jelileri arqyly tikeleı efırge shyǵyp, óziniń saılaýǵa túsý maqsaty týraly, saılaýaldy baǵdarlamasynyń basym baǵyttary týraly sóz qozǵady. Onlaın úndeýdi 10 myńǵa jýyq adam kórip, birqatary suraqtaryn qoıyp, birden jaýap aldy. Kandıdat bul joly negizinen saıası erkindik taqyrybynda sóıledi. Endi budan bylaı tikeleı efırge turaqty túrde shyǵyp, óziniń ustanymdaryn jan-jaqty túsindirmek. Keleside ult bolmysy haqynda oı órbitedi.
Al kandıdattyń óńirlerdegi nasıhat jumystaryna kelsek, Aqmola oblysy Stepnogor qalasyndaǵy mádenıet saraıynda Á.Qosanovty qoldaýǵa arnalǵan dóńgelek ústel jıyny ótti. Onda úmitkerdiń oblystyq shtabynyń músheleri jáne senimdi ókilderi el aldynda sóz sóılep, saılaýaldy tuǵyrnamasyn tanystyrdy. Jıynǵa 40 shaqty adam qatysty. Kezdesýde sóz tizginin oblystyq saılaýaldy shtabtyń basshysy Darhan Shógshir ustady. Kandıdat baǵdarlamasynyń negizgi baǵyttaryna qanyqqan qoǵam belsendileri, bilim berý salasynyń qyzmetkerleri, jastar men qarapaıym turǵyndar óz pikirlerin ortaǵa saldy. Sonyń ishinde qatysýshylar halyqty rýhanı turǵyda órkendetý týraly tarmaqtardy atap ótti.
Sonymen qatar Jambyl oblysynyń Baızaq aýdanyndaǵy Túımekent aýylynda oblystyq saılaýaldy shtabtyń úgit-nasıhat toby jergilikti mádenıet zalynyń ǵımaratynda turǵyndarmen kezdesti. Basqosýǵa Á.Qosanovtyń aımaqtaǵy senim bildirgen adamdary – oblystyq shtabtyń basshysy Baqytjan Maqashev, fılologııa ǵylymdarynyń kandıdaty, Jýrnalıster odaǵynyń múshesi Temirbaı Muqashev, Qazaqstan Mádenıet salasynyń úzdigi, respýblıkalyq dástúrli ánshiler baıqaýynyń birneshe márte jeńimpazy Baqyt Shaǵyrbaev qatysty. Kezdesý barysynda elimizdiń ishki jáne syrtqy saıasaty, jergilikti halyqtyń áleýmettik máseleleri talqylandy. Kandıdattyń saılaýaldy tuǵyrnamasy keńirek zerdelenip, túsindirilip, jınalǵan qaýymnyń suraqtaryna jaýap berildi. Sońynda ánshi B.Shaǵyrbaevtyń oryndaýyndaǵy ánder kópshilikke tartý etildi.
* * *
«Uly dala qyrandary» respýblıkalyq qozǵalysy atynan prezıdenttikke kandıdat retinde tirkelgen Sádibek Túgeldiń saılaýaldy tuǵyrnamasy jarııalandy. Eshqandaı partııaǵa qatysy joqtyǵyn alǵa tartqan kandıdat demografııaǵa, shetelderde turatyn qandastarymyzdyń oralýyna, memlekettik tildiń mártebesin kóterip, ony tolyq qoldanysqa engizýge, Alashordanyń ıdeıalaryn jańǵyrtýdy qolǵa alýǵa, jemqorlyqpen kúresti pármendi júrgizýge, «Bıler sotyn» engizýge kúsh salmaq. Onyń baǵdarlamasy «Ulaǵatty urpaq – ulttyq ustanym», «Aýyl – altyn besigimiz», «Jemqorlyqqa tosqaýyl qoıamyz!» «Biz qyrandarmyz – biz birgemiz», «Jer – janymyz, til – tuǵyrymyz» atty bólimderden turady.
Kandıdattyń osy ustanymdaryn kópshilikke jetkizý úshin keshe Kókshetaýdaǵy saılaýaldy qoǵamdyq shtaby Dostyq úıinde jergilikti turǵyndarmen kezdesý uıymdastyrdy. Onda S.Túgeldiń senim bildirilgen ókilderi jınalǵan qaýymmen qazaq tiliniń qoldanys aıasyn keńeıtý, ulttyq qundylyqtardy jas urpaqtyń boıyna darytý, aýyl-aımaqtyń áleýetin kóterý týraly pikir almasty.
Búgin S.Túgeldiń ózi Shýche qalasyna baryp, Mádenıet úıinde shyǵarmashylyq keshin ótkizedi. Sol is-sharanyń barysynda saılaýaldy baǵdarlamasyn qala turǵyndaryna jan-jaqty túsindirmek.
Daıyndaǵan Orynbek О́TEMURAT,
«Egemen Qazaqstan»