Chempıonatqa álemniń 20 elinen eń myqty sadaqshylar qatysady. Jarys «Azııa stıli», «Túrik stıli» jáne «Jamby atý» erejeleri boıynsha ótedi.
Elorda turǵyndary men qonaqtary 1 maýsymda saǵat 10:00-den 14:00-ge deıin, sondaı-aq 2 maýsymda saǵat 10:00-den 14:00-ge deıin jáne 15:30-dan 18:30-ǵa deıin sadaqshylardyń ónerin tamashalaı alady. Jeńimpazdardy marapattaý rásimi sol kúni saǵat 19:00-de ótedi.
«31 mamyrdan 2 maýsymǵa deıin elordada alǵash ret Nur-Sultan Ethno Fest etnomádenı merekesi ótedi. «Han-Shatyr» SOO janyndaǵy alańda kıiz úıler tigilip, jylqy men qustardyń kórmesi ótedi. Kelýshiler ózderin qysh ónerinde synaı alady. Etnoaýyl kelýshiler úshin saǵat 10:00-den 22:00-ge deıin ashyq bolady», – delingen elordanyń mádenıet jáne sport basqarmasynyń habarlamasynda.
Sonymen qatar, 1 maýsym – Balalardy qorǵaý kúni qarsańynda Nur-Sultan Ethno Fest aýmaǵynda balalar attraksıondary jumys isteıtin bolady. Festıvaldiń kishkentaı qonaqtary astanalyq qýyrshaqtar teatrynyń úzdik qoıylymdaryn tegin tamashalap, at ústinde serýendep, asyq pen lıangada oınap, otbasylyq estafetaǵa qatysa alady.
Nur-Sultan Ethno Fest festıvaliniń resmı ashylýy 31 mamyrda saǵat 19:00-de ótedi.