Jobanyń maqsaty – otandyq jáne jergilikti týrızmdi damytý joldaryn qarastyrý, aımaqtyq kıeli jerler men jádigerlerdi nasıhattaý. Jańa marshrýttardyń jelisin qurý oraıynda stýdentter men magıstranttar arasynda konkýrs uıymdastyryldy.
«7 jańa týrıstik marshrýt» startap tanystyrylym baıqaýyna qatysýǵa ótinish bildirgen 19 toptyń ishinen aldyn ala irikteýden ótken 8 top fınalǵa joldama aldy. Atap aıtqanda, jarysqa Jaratylystaný fakýltetinen «Qurlyqtar juldyzy», «Jalyndy jastar», «Qyran» jáne «Sırıýs», Qazaq fılologııasy jáne álem tilderi fakýltetinen «Asý», «Jetisý», Áleýmettik-gýmanıtarlyq fakýltetinen «7Qaz» jáne «Suńqar» toptary qatysty.
Saıys barysynda ár komanda kópshilikke keńinen tanyla qoımaǵan, alaıda týrıstik áleýeti joǵary nysandardyń ózindik ereksheligin aıtyp, bıznes-josparyn qorǵady. Qazylar alqasy árbir jumystyń ereksheligin, máni men mańyzyn jete sarapqa saldy. Nátıjesinde, Qazaq fılologııasy jáne álem tilderi fakýltetiniń stýdentterinen quralǵan «Jetisý» tobynyń «Jetisý – jer jánnaty» taqyrybyndaǵy jobasy úzdik dep tanyldy. Ekinshi orynǵa Jaratylystaný fakýltetiniń stýdentterinen quralǵan «Qyran» tobynyń «Syrǵa toly Syr eli» atty jobasy ıe boldy. Atalǵan fakýltettiń «Jalyndy jastar» komandasynyń «Rýhy bekem kıeli meken Jetisý» atty jobasy úshinshi oryndy mise tutty.
Aldaǵy ýaqytta úzdik dep tanylǵan marshrýttar boıynsha arnaıy ekspedısııa uıymdastyrylmaq. Ekspedısııa barysynda saıys jeńimpazdary ózderiniń qurastyrǵan marshrýttarymen júrip, týrıstik nysandar men kıeli jerlerdi gıd retinde tanystyratyn bolady.
– Týrızmdi damytý úshin elimizde barlyq alǵysharttar bar. Dese de Qazaqstan baı týrıstik-rekreasııalyq áleýetke ıe bolǵanymen, eldegi týrızm salasy jetkilikti deńgeıde damymaı otyr. Nege? Saýal kóp. Qazaqstanǵa keletin týrısterge «Medeý» muz aıdyny, «Shymbulaq» kýrorttyq kesheni, Sharyn shatqaly, Kólsaı, Býrabaı sııaqty týrıstik nysandar tanys bolǵanymen, ulttyq rýhtyń qaınar bulaǵyna aınalǵan kıeli de qasıetti oryndar týraly bile bermeıdi. Sondyqtan da búginde osy taqilettes qasıetti mekenderdiń aımaqtyq jelisin jasap, bir júıege keltirýdiń mańyzdylyǵy artyp otyr, – deıdi ýnıversıtet ǵalymdary. Jandar ASAN, Qazaq ulttyq qyzdar ýnıversıtetiniń baspasóz jáne qoǵammen baılanys bóliminiń basshysy