Sársenbi, 24 sáýir 2013 2:27
Qazir ekiniń biriniń aýzynda memlekettiń zeınetaqy júıesin jańǵyrtý týraly áńgime júr. Áıelderdiń zeınet jasyn erlermen teńestirip, 63-ke deıin ulǵaıtý týraly joba ómirdiń ár salasynda eńbek etip júrgen áıelderdi oılandyryp tastaǵany ras.
Sársenbi, 24 sáýir 2013 2:27
Qazir ekiniń biriniń aýzynda memlekettiń zeınetaqy júıesin jańǵyrtý týraly áńgime júr. Áıelderdiń zeınet jasyn erlermen teńestirip, 63-ke deıin ulǵaıtý týraly joba ómirdiń ár salasynda eńbek etip júrgen áıelderdi oılandyryp tastaǵany ras.
Jaqynda zeınetaqy júıesin jańǵyrtýǵa baılanysty oblysta ótken májilis osy suraqtardyń birazyna jaýap bergendeı boldy. Oǵan aýdan, qala ákimderimen qatar, eńbek ujymdarynyń jetekshileri, kásipodaq uıymdarynyń ókilderi qatysty.
– Qazaqstandy damytýdyń qazirgi zamanǵy satysynda biz ádister men túrli sharalardyń qajettigin jáne ony qabyldaý kerek ekenin túsinýge tıispiz. Bul úshin bizdiń qyzmetimizde anyqtyq, aıǵaqtyq, senimdi málimet jáne aqparattar bolýy kerek, –dep málimdedi oblys ákimi Nuraly Sádýaqasov.
Al oblys ákiminiń orynbasary Serik Bekturǵanov osy taqyrypqa baıandama jasap, zeınetaqy júıesin jańǵyrtý úderisinen keri sheginbeıtinimizdi belgili aıǵaqtardy mysalǵa ala otyryp, túsindirdi. Áıelderdiń zeınet jasyn ulǵaıtý zeınetaqy júıesin jańǵyrtýdyń bir kepili bolmaq. Mundaı shara barlyq damyǵan elderde júrgizilip jatqan úderis.
– Qazir yntymaqty zeınetaqynyń ýaqytyn kemitý jınaqtaýshy emes, bazalyq zeınetaqymen ótelip otyr. 2040 jyldan bastap, áıelder eńbek ótilimen esepteletin yntymaqty zeınetaqy almaıdy. 1980-1982 jyly ómirge kelgenderden bastap ári qaraı áıelder tek óziniń jınaqtaǵan zeınetaqysyna senetin bolady. Memlekettiń eń tómengi kepili taǵy bar. Degenmen, qamsyz qarttyǵyn qamtamasyz etemin degender tek eńbekpen jınaqtaǵan qarjysyna ǵana arqa súıeıdi, – dedi Serik Shyńǵysuly.
Serik Bekturǵanov Biryńǵaı jınaqtaýshy zeınetaqy qorynyń artyqshylyqtaryn túsindirdi. Árıne, kóp balaly analar, aýyr jumystaǵy, bazarda bir kúndik nápaqasyn taýyp turǵan áıelder, múgedekter týraly saýaldar da jeterlik. Osy oraıda negizinen áıelderden turatyn ujym – «Alpamys» aıaq kıim fabrıkasynyń dırektory Almagúl Sáýdenovanyń pikirin bilgenbiz.
– Zeınetaqy júıesin jańǵyrtýdan eńbek etken, jumysy bar áıelder utylady dep oılamaımyn. Tek qazir bizde áleýmettik ártúrli toptaǵy áıelder bar. Osy jańǵyrtý kezinde solardyń jaǵdaıy eskerilse dep oılaımyn. Al eń bastysy, dúnıe júzindegi damyǵan elder tájirıbeden ótkizip jatqan bul isti memleket beker qolǵa alyp otyrǵan joq. Memleketti damytatyn qarjyny ınvestısııalyq qarymdy jobalarǵa salmaı, pyshaq ústinen zeınetaqyǵa bólip bere berse, ol eldiń qazynasynda qandaı bereke qalady? Bul – memleketti damytý, sol arqyly adamdardyń ál-aýqatyn kóterý úshin baryp otyrǵan shara. Sondyqtan ony patrıottyq sezimmen túsinýimiz kerek. Memleket damysa, eshkimdi de taǵdyr tálkegine tastamaıdy, – deıdi Almagúl Qasymqyzy.
Májiliste sóılegender qujatqa usynystar jasaýmen qatar, adamdardyń naryqqa beıimdelýi, mentalıtetimizge synı qaraýymyz qajettigin de áńgime etti. «Kóz qorqaq, qol batyr» degen emes pe? Masyldyqtan birjolata arylyp, árkim óz ómirin jastan oılaýǵa, josparlaı bilýge tárbıeleıtin ýaqytqa jeteleıtin shara bolar degen oıdy sózge tartqandar aıtyp jatty. Kópshiliktiń kúdigi senimge aınalyp kele jatqandaı.
Názıra JÁRIMBETOVA,
«Egemen Qazaqstan».
QOSTANAI.