«Batys» óńirlik qolbasshysynyń tárbıe jáne áleýmettik-quqyqtyq jumystar boıynsha orynbasary podpolkovnık Baqyt Alazovtyń aıtýynsha, áskerı bólimderde ashylǵan saılaý ýchaskelerinde daýys berýshilerdiń belsendiligi óte joǵary bolǵan. Áskerı qyzmetkerlerdiń jeke quramy ǵana emes, olardyń otbasy da saıası naýqanǵa túgel qatysqan.
Saılaý ýchaskelerinde daýys berý zań boıynsha tańǵy saǵat 7-de bastalsa, arada bir saǵat ýaqyt ótkende saılaýshylardyń 70 paıyzynan artyǵy óz daýysyn berip úlgergen. Saılaýǵa qatysýshylardyń basym bóligi – 18-ge endi tolǵan, tuńǵysh ret daýys berý quqyǵyna ıe bolǵan jas sarbazdar.
Áskerge Qaraǵandy qalasynan shaqyrylyp, qazir Aqtaýdaǵy 6656 áskerı bóliminde Otan aldyndaǵy boryshyn atqaryp jatqan qatardaǵy jaýynger Berik Esqalıev ta osyndaı tuńǵysh daýys berýshilerdiń biri. «Men táýelsiz Qazaqstannyń azamaty retinde elimizde ultaralyq tatýlyq, yntymaq bolǵanyn qalaımyn. Sol úshin búgin azamattyq paryzymdy atqaryp, daýysymdy berdim» deıdi jas sarbaz.
Oral qalasyndaǵy 5517 áskerı bólimde qyzmet etýshi Qaırat О́tegenovtiń týǵan jeri – Almaty oblysy. Áskerı kıim kıgeli ótken 7 aı ishinde qyzmetiniń qyr-syryn, qoǵamdyq tártiptiń mańyzyn, tatýlyq pen yntymaqtyń baǵa jetkisiz qundylyq ekenin uǵyp qalypty. «Otanymyzda beıbit ómir men kelisim ornap tur. Soǵan maqtanamyn!» deıdi ol.
- Uıymshyldyqpen ótken daýys berýdiń nátıjesin qorytyndylap ta úlgerdik. Bizge qarasty barlyq 5 jabyq saılaý ýchaskesinde tirkelgender 100 paıyz daýys berdi. Zań buzýshylyqtar bolmady. Tańerteńgi saǵat 10-da tolyǵymen tańdaýymyzdy jasap úlgerdik, - deıdi podpolkovnık Baqyt Alazov.
Aıta keteıik, Qazaqstannyń batys óńirindegi áskerı bólimderde saılaý quqyǵy bar 5 myńǵa jýyq azamat qyzmet etedi.
Batys Qazaqstan