Erekshe atap óter bir úlgini bóle-jara aıtýdy jón kórdik. Bilim ordasynyń kire berisinde «Úzdik oqyrmanǵa syılyq» degen jazý qoıylǵan úsh velosıped turdy. Mine, osy úsh velosıped ıeleri anyqtalǵan sát erekshe este qaldy. Olar oqýǵa tıis júz kitapty eńsergender eken. Aldy 30 kitapty oqypty. Úsh júldeger qatarynda segizinshi synyp oqýshysy – Móldir Qurbanbaı, besinshi synyp oqýshysy – Symbat Muratjanqyzy, tórtinshi synyp oqýshysy – Aıala Saılaý boldy. Qundylyqqa den qoıǵandar ózderi tańdaǵan shyǵarmalardy oqyp qana qoımaı, mazmunyn synyptastaryna, ustazdaryna, ata-analaryna aıtyp berýdi daǵdyǵa aınaldyrypty.
– Men buryn telefon men teledıdardan kóz almaıtyn edim. Mektebimizde kitap oqýǵa qulshynys bastalǵannan beri odan tyıyldym dese de bolǵandaı. Muhtar Áýezovtiń, Beıimbet Maılınniń, Berdibek Soqpaqbaevtyń, Muqaǵalı Maqataevtyń, ózge de avtorlardyń týyndylaryn oqydym. Sonyń nátıjesinde oı-órisim ósip, júıeli sóıleýge, saýatty jazýǵa, izet-ınabattyń qandaı bolatynyn bile bastaǵandaımyn. Ásirese, úlkendi, ata-anany syılaýdyń ulttyq úlgisin tanyp-bilgenim anyq. Biz qazir otbasymyz boıynsha kitap oqýdy dástúrge aınaldyrdyq. Buryn kitap dúkeni degendi bile qoımaıtyn edim. Endi jıi baramyn. Átteń, qazaq kitaptarynyń baǵasy óte qymbat, arzandatýǵa bolmaı ma eken? Taǵy bir aıtarym, balalarǵa arnalǵan qazaq kitaptary az kezdesedi. Esesine Máskeýden shyqqan oryssha kitaptar óte kóp, – deıdi jeńimpaz oqýshynyń biri Symbat.
Al mektep dırektory Quralaı Baıtájikovanyń aıtýynsha, zamanaýı tehnıkalyq quraldardy meńgerýge esh qarsylyq joq, biraq ulttyq, álemdik rýhanı qundylyqtardyń jóni bólek. Biz qundylyqtyń basy kitap dep sheshtik. Osyny ár ata-ana qoldasa deımiz. Eń bastysy, ul-qyzymyzdyń densaýlyǵy qymbat ekeni anyq. Ártúrli zamanaýı quraldar oqýshynyń kózine, qulaǵyna, oılaý júıesine keri áser ete bastaǵanyn ǵalymdar dáleldep otyr. Ony paıdalanyp, búgin tynysh otyrǵan balanyń erteń júıkesi syr berse, álgi tynyshtyq buzylmaı qoımaıdy. Tipti azaby men tozabyn ata-analar kórýi múmkin. Onyń keıbir keri áserlerin kórip te, estip te júrmiz. Basty maqsatymyz – birinshi synyptan kitap oqýǵa baýlý. Ár synyptan kitap buryshyn ashyp qoıdyq, kitaphana jabdyqtadyq. Dálizderge de kitap qoıý dástúrin qalyptastyryp kelemiz. Ár aptanyń sársenbi, senbi kúnderin kitap oqý kúni dep belgiledik. Oǵan bárimiz qatysamyz. Bul bastama ornyqty deýge bolady. Bıyl 2000 oqýshynyń ishinen ondaǵan oqýshy úzdik dep tanylsa, úsh úmitker júldeger atanyp otyr. Velosıpedtiń oqýshy densaýlyǵyna paıdaly ekenin de eskerdik. Bul bastamamyz jalǵasa beredi. Onyń túrli joldaryn oılastyrýdamyz. Oqýshyny yntalandyrý joldary da qarastyrylý ústinde. Qoldaýshylarymyz da, demeýshilerimiz de tabylyp jatyr, – deıdi mektep basshysy.
Shynynda, bul úlgi úırener úrdis ekeni sózsiz. Bul basqa bilim uıalarynda da jalǵasyn taýyp jatsa, nur ústine nur. Tipti osy ıgilikti isti júzege asyrý jaıyn alqaly jıynda qozǵap, bastamashylar tájirıbe almassa, ata-analar iltıpat tanytsa, barymyzdy baǵalap, joǵymyzdy túgender edik. Eń bastysy, urpaǵymyzdy telefonǵa telmirýden qutqarar edik.