«Arystan» mamandandyrylǵan lıseıi memleketimizdiń bilim berý isindegi jańalyqtardyń biri bolyp tabylatyn erekshe oqý jobasy. Ol 2011 jyly «Nursultan Nazarbaevtyń Bilim berý Qory» Qoǵamdyq qorynyń aıasynda qurylǵan. Ile Alataýynyń bókterindegi tabıǵaty ásem Besqaınar aýylynyń aımaǵynda ornalasqan keshende elimizdiń barlyq aımaqtarynan kelgen 9 ben 11 synypta oqıtyn 240 jasóspirim qaıyrymdylyq negizinde bilim alady. Lıseıdiń bitirýshi túlekteri qazaqstandyq jáne sheteldik áskerı oqý oryndarynda óz bilimderin abyroımen jalǵastyryp, el bedelin asqaqtatýda.
Bilim nysanynyń negizgi maqsaty – jasóspirimderdi joǵary deńgeıli bilimmen qamtamasyz etý, olardyń boıynda erlik, qajyr-qaırat, tózimdilik, joǵary mádenıet, azamattyq borysh pen jańa qazaqstandyq patrıotızmdi qalyptastyrý. Dástúr boıynsha bıyl da bitirýshi túlekterge attestattar men arnaıy tós belgileri tapsyrylyp, bolashaq ómirlerine sát sapar tilegen quttyqtaýlar aıtyldy. Lıseıster altyn uıa – «Arystan» lıseıiniń Týymen qoshtasyp, bolashaq bitirýshilerge arnalǵan kapsýlany ornatty.
– Qurmetti túlekter, sizder Qazaqstannyń bolashaǵysyzdar. Lıseıde alǵan bilim men tárbıe búkil ómirlerińizge azyq bolady dep oılaımyn. Búgin bitirip jatqan 80 balanyń árbiri el damýyna úles qosady dep senemiz. Ár memleket óziniń Qarýly Kúshterimen ǵana qaýip-qaterden qorǵana alady. Áskeri kúshti el ǵana jahandaný áleminde óz ornyn saqtaıdy. Al bizdiń arystandyqtar kemel bolashaǵymyzdyń qaýipsizdigin qorǵaıtyn elıtalyq quram bolyp qalyptasady. Búginde lıseı Otan qorǵaýshylardyń sapaly tobyn qalyptastyrýǵa kúsh salýda. Qazaqstan Qarýly Kúshteriniń qataryn tolyqtyratyn bilimdi de, sanaly, patrıot bolashaq áskerı qyzmetkerlerge tek aq jol tileımiz! Kók baıraǵymyz kógimizde máńgi jelbiresin, Otan qorǵaýshy ulandar sany men sapasy jyl saıyn arta bersin, – deıdi túlekterdi bitirý kúnimen quttyqtaǵan lıseı basshysy zapastaǵy general-maıor Sábıt Taýlanov.
Lıseıdiń oqý-materıaldyq bazasy kompıýtermen, ınterbelsendi taqtalarmen jabdyqtalǵan. Lıseı zamanaýı synyptar men laboratorııalyq keshenderdi, muǵalimderge arnalǵan turǵyn úılerdi, lıseısterdiń jatyn ornyn, basseın, sporttyq jattyǵý keshenderin, lıngafondyq kabınetterdi, medıatekalardy, mýltımedıalyq sholý ortalyǵy jáne 20 myńnan astam ǵylymı jáne kórkem ádebıetterden turatyn kitap qory bar kitaphanany qamtıdy. Bıylǵy oqý jylynda lıseı qabyrǵasynan Almaty oblysy ákiminiń qoldaýymen arnaıy IT kabıneti ashylǵan.
ALMATY