Dj.Assanj 2010 jyldary álemge áıgili tulǵaǵa aınaldy. WikiLeaks saıtyna AQSh tikushaqtarynyń Baǵdat qalasyndaǵy beıbit turǵyndarǵa oq jaýdyrǵany beınelengen vıdeosyn jarııalaǵannan keıin kóp uzamaı Dj.Assanjǵa qarsy shaǵymdar túsip, ony qamaýǵa alý sharalary júrgizile bastady. Ol Shveısarııany qaýipsiz sanap, sol elge qonys aýdarady.
Shvesııa soty Dj.Assanjǵa qarsy is qozǵap, ony Ulybrıtanııadan ekstradısııalaýǵa sheshim shyǵarady. Dj.Assanj sot sheshimine qarsy shyǵyp, Ulybrıtanııadaǵy Ekvador elshiliginde osy jyldyń 11 sáýirine deıin, ıaǵnı 7 jylǵa jýyq ýaqyt boı tasalady. Buǵan deıin belgili bolǵandaı, Assanj óz saıtynda Ekvador Prezıdentiniń sybaılas jemqorlyqqa qatysy bar degen aqparat jarııalady. Buǵan ashýy kelgen Ekvador prezıdenti oǵan saıası baspana berýden bas tartqan edi. Ulybrıtanııa úkimeti bul jaǵdaıdy paıdalanyp, ony qamaýǵa aldy.
Al Assanjdyń kinásin dáleldeıtin aıǵaqtardyń jetkiliksiz bolýy sebebinen ol áli kúnge deıin Ulybrıtanııa abaqtysynda tutqynda. AQSh Ádilet mınıstrligi 23 mamyrda 17 bap boıynsha aıyp taǵyp, ony 175 jyl bas bostandyǵynan aıyrýdy usynǵan edi.
Buǵan deıin Brıtanııa IIM basshysy Sadjıd Djavıd aıyptalýshy Assanjdy AQSh-qa ekstradısııalaý týraly usynysqa kelisimin bergen-di. VVS aqparattyq agenttiginiń habarlaýynsha, ekstradısııa úkimi qabyldanǵan jaǵdaıda Dj.Assanj AQSh-qa 2020 jyldyń aqpan aıynda jóneltiledi.Aýstralııa úkimetiniń basshysy Skott Morrıson óziniń otandasy Dj.Assanjǵa arnaıy kómek kórsetilmeıtinin, memleket tek konsýldyq járdemmen shekteletinin málimdedi. Keıbir sheteldik aqparat quraldary men sarapshylar AQSh úkimeti D.Assanjdy rasymen kináli dep tanysa, óz Konstıtýsııasynda oıyp jazylǵan oı men sóz bostandyǵyna qarsy keletinin aıtady.
Politico gazeti AQSh prokýrorlarynyń qajetti aıǵaqtar men dálelder usynýǵa ýaqyty jetpeıtinin jazady. Zańǵa sáıkes, aıyptalýshy alǵash qamaýǵa alynǵan kúnnen 60 táýlik ishinde tıisti qujattar berilýi kerek eken. Al onyń kinásin dáleldeýge qajetti keıbir aqparattar, tipti qupııa. Muny sot zalynda talqylaý olardyń jarııa bolýyna alyp kelmek.
Dál osy oqıǵaǵa qatysty álem sarapshylarynyń pikiri ekige jarylǵandaı. Biri Assanjdy jaqtap jatsa, endi biri aıybyn ótesin deıdi. Bir qyzyǵy, dál Assanjdyń saıty jarııalaǵan aqparattardy New York Times gazeti de Donald Tramp úkimetiniń ruqsatynsyz jarııalaǵanyn, alaıda basylymǵa esh aıyp taǵylmaǵany aıtylýda. Bul jerde eki túrli standarttar baıqalady.
Keıbir sarapshylar ony «zamanaýı aqparattyq soǵystyń qolbasshysy» deıdi. Olar óziniń jeke bas bostandyǵynan shyndyqty bıik qoıǵan Dj.Assanjdy qoldaýǵa shaqyryp jatyr. Búginde Assanjdyń AQSh úkimetine berilýine narazylar qatary kóbeımese, azaımaı tur. Sıdneı, Kıev, Berlınde Assanjdy qoldaýshylar onyń bosatylýyn talap etip, sherýge birneshe ret shyqty.
Dj.Assanjdyń densaýlyǵyna alańdaýshylar da az emes. Keı aqparattarǵa qaraǵanda, Ekvador elshiligindegi 7 jyl men Ulybrıtanııanyń Belmarsh abaqtysyndaǵy 7 apta aıyptalýshynyń densaýlyǵyna keri áserin tıgizbeı qoımaǵan kórinedi. Onyń qorǵaýshylary Per Samýelson, Garet Peırs jáne BUU-nyń adamǵa zábirlik kórsetý, qanaý máselesi boıynsha arnaıy baıandamashysy Nıls Melser Assanjdyń densaýlyǵy nasharlaǵany týraly aqparatty ras dep tanyp, túrmede oǵan psıhologııalyq qysym kórsetip jatqanynyn málimdedi.