Mánerlep syrǵanaýshynyń Sochı Olımpıadasynyń fınaldyq baǵdarlamasyn oryndap turǵan sátin órnektegen eńseli eskertkishtiń músini qoladan, tuǵyry granıtten quıylǵan. Bıiktigi – 2,4 metr. Eskertkish qaladaǵy Denıs Ten qapyda qaza tapqan Qurmanǵazy men Baıseıitova kósheleriniń qıylysynda oryn tepken. Aq aıdynda aqqýdaı qalyqtaǵan aıboz uldyń jarqyn beınesin kóz aldyńa ákeletin óner týyndysyn somdaǵan sanktpeterbýrgtik músinshi Matveı Makýshkın. О́ner ıesi buǵan deıin shahardaǵy jastar jıi bas qosyp án salatyn orynǵa aınalǵan Vıktor Soıdyń aıryqsha músinin keıiptegen edi.
Eskertkishtiń ashylý rásimine Denıstiń óneri men ómir jolyn baǵalaıtyn Almaty turǵyndary, sondaı-aq tanymal sportshylar men qoǵam qaıratkerleri qatysty. Olar tas tuǵyrǵa gúl shoqtaryn qoıyp, tas músinge aınalǵan tańǵajaıyp talant ıesin qurmetpen eske aldy.
Denıs óziniń bir suhbatynda alǵa qoıǵan maqsattarynyń kóptigin, ózi qurastyrǵan ssenarııdiń jelisi boıynsha fılm túsirýdi armandaıtynyn aıtqan edi. Alaıda onyń eń úlken armany tórtjyldyqtyń basty básekesinde qazaqtyń týyn kókte jelbiretý bolatyn. Sportshynyń aýyr qazasynan keıin áıgili jattyqtyrýshy Frenk Kerroll da karerasyn osymen támamdaıtynyn habarlady. Denıs Tenniń ónerin tamashalaǵan mıllıondaǵan adam karta betinen Qazaqstandy izdedi. Onyń jarqyn beınesi máńgi kóz aldymyzda. Eske salsaq, osyǵan deıin Almatyda Denıs Ten turǵan úıdiń qabyrǵasyna memorıaldy eskertkish taqta ornatylǵan bolatyn.
ALMATY