Bıyl 8 mamandyq boıynsha 135 kýrsant áskerı oqý ornyn támamdady, olardyń 32-si úzdik dıplommen, al 3 kýrsant «Áskerı oqý ornyn úzdik bitirgeni úshin» tósbelgisimen marapattaldy.
Saltanatty sharaǵa Halyq Qaharmany, kosmonavt, Qazaqstannyń Áskerı-áýe kúshteriniń general-maıory Aıdyn Aıymbetov, májilis depýtaty Baqytjan Smaǵul, Qorǵanys mınıstrliginiń basshylyǵy, Qarýly Kúshteriniń ardagerleri, Áýezov aýdandyq ákimshiliginiń ókilderi jáne bitirýshilerdiń ata-analary men jaqyndary qatysty.
Jas ofıserler saltanatty marshpen júrip ótip, máńgilik alaýǵa gúl shoqtaryn qoıdy. Qarýmen saptyq defıle kórsetken soń áskerı oqý ornynynyń Jaýyngerlik Týymen qoshtasty. Bitirýshiler juptarymen qoshtasý valsin bılep, kókke aq kepterlerdi ushyrdy.
– Búgin sizder ofıser pogonyn taǵyp, joǵarǵy áskerı oqý ornyn bitirgeni týraly dıplomǵa ıe boldyńyzdar. Naǵyz er azamattarǵa tán mamandyqty tańdaǵan soń namys týyn bıikte ustap, «qazaqstan áskeriniń ofıseri» degen joǵary atqa laıyq bolasyzdar degen senimdemin, - dedi REjBÁII-diń bastyǵy general-maıor Asqar Mustabekov.
Jas leıtenant, altyn medal ıegeri Almaz Amantaıuly áskerıler áýletinen shyqqanyn, sondyqtan oqýda únemi alda bolýǵa tyrysqanyn aıtady.
– Áskerı ınstıtýt qabyrǵasynda bolǵan 5 jylda bilim men dostyqtyń qadirine jettim. Bizdiń ıyǵymyzǵa pogonmen qosa elimiz úshin jaýapkershilik pen mindet júkteldi. Halqymyz ben onyń Prezıdenti – Qarýly Kúshterdiń Joǵarǵy Bas qolbasshynyń senimin aqtaımyz, aqtyq demimiz qalǵansha adal qyzmet etemiz, - dedi ol.
Qorǵanys mınıstrligine qarasty Radıoelektronıka jáne baılanys áskerı-ınjenerlik ınstıtýty Orta Azııa aımaǵy boıynsha radıotehnıkalyq mamandyqtar boıynsha maman daıyndaıtyn jalǵyz áskerı oqý orny bolyp tabylady. Joǵarǵy áskerı ınstıtýt zenıtti zymyrandy, radıotehnıkalyq áskerleri, áskerler men qarý-jaraqty avtomattandyrylǵan basqarý júıeleri ınjenerleri, baılanys áskerleri, avıasııany radıotehnıkalyq qamtamasyz etý mamandyqtary úshin bilikti ofıserlerdi daıarlaıdy. Instıtýt qurylǵaly beri (2001 j. bastap) 320 kýrsant úzdik dıplommen, al 30 kýrsant «Áskerı oqý ornyn úzdik bitirgeni úshin» tósbelgisimen marapattalǵan.