О́ńirdegi egin sharýashylyǵy dese eske Sharbulaq aýyldyq okrýgindegi «Sapa-2002» sharýa qojalyǵy túsedi. Bıyl da jyldaǵy sharýaqorlyǵynan jańylmaǵan qojalyq alqaptaǵy altyn astyqty tókpeı-shashpaı jınap alýǵa kiristi. Agrotehnıkalyq talaptardy tııanaqty atqarǵan kásiporyn 2000 gektarǵa jýyq alqapqa egilgen arpa men bıdaıdy jınaýǵa 10-ǵa jýyq agrotehnıka tartyp, 20 shaqty adamdy eńbekke jumyldyrdy.
– Alqapqa bıdaıdyń 24 sortyn sepkenbiz. Aldyn ala boljam boıynsha ár gektarynan 30-35 sentner ónim alamyz dep otyrmyz. Aldaǵy ýaqytta 3 sort tuqymyn (altyn masaq, kondıter, shóp) kóbeıtip, óndiriske qoımaqpyz. Maqsatymyz Saryaǵashtyń ǵalymdarymen kelisimshartqa turyp, tuqym sapasyn odan da sapaly etý, – deıdi «Sapa-2002» JShS dırektory Nurjan Áshirov.
Sharýalar aýa raıy qolaısyzdaý bolǵanymen qambaǵa túser ónim byltyrǵydan kem bolmaıtynyn aıtýda. Sebebi agrotehnıkalyq sharalar der kezinde jasalyp, memleket tarapynan beriletin arzan janar-jaǵarmaı men mıneraldy tyńaıtqyshtar ýaqtyly berilgen. Aýdan ákimi Tólegen Telǵaraevtyń aıtýynsha, aýdan boıynsha egin orýǵa qajetti 218 kombaın, 125 tasymaldaýshy tehnıka, 103 traktor tirkemeleri saqadaı saı. «DjonDır» kompanııasy usynǵan sý jańa tehnıkalar sharýalardyń qajetin tolyq óteýge tıis.
Aıta keterligi, aǵymdaǵy jyly Túrkistan oblysy boıynsha aýyl sharýashylyǵy daqyldarynyń egis kólemi 823 myń gektarǵa jetti. Bul ótken jylmen salystyrǵanda 9,8 myń gektarǵa artyq. Oblys boıynsha bıdaı 178,7 myń gektarǵa egildi. Aldyn ala boljam boıynsha 218,6 myń ga masaqty daqyldardyń ár gektarynan ortasha eseppen 21,2 sentnerden ónim alý josparlanýda. Astyq orýǵa qolda bar 1012 kombaınnyń 90-95 paıyzy orý, jınaý jumystaryna paıdalanylyp jatyr.
Kúni búginge deıin188 myń tonna kartop, 418 myń tonna kókónis, 125 myń tonna baqsha daqyldary jınalǵan. Qazirgi tańda ishki suranystan artyq kólemi Nur-Sultan, Almaty qalalary men basqa oblystarǵa jáne shetelge eksporttalýda.
Oblystyq aýyl sharýashylyǵy basqarmasy taratqan aqparatqa súıensek, kúngeılik eńbekqor dıqandar jyl sońyna deıin kartop, kókónis, baqsha ónimderinen 2,7 mln tonna ónim jınaýdy josparlap otyr.
Qazyǵurt – Sharbulaq