«Eksporttaýshylar vıtrınasy» platformasy sheteldik satyp alýshylarǵa otandyq ónimderdi ońaı tabýǵa múmkindik beredi. Júıede taýarlar birneshe sala boıynsha toptastyrylǵan. Árbir ónimge qatysty tolyq sıpattama men óndirýshi týraly aqparat ornalastyrylǵan, dep jazady Egemen.kz.
Qazaqstannyń eksporttyq-kredıttik agenttigi «Eksporttaýshylar vıtrınasy» atty halyqaralyq sıfrlyq platformany iske qosty. Jańa resýrs otandyq taýarlar men qyzmetterdi shetel naryǵyna keńinen tanystyrýǵa baǵyttalǵan. Platforma arqyly sheteldik satyp alýshylar «Made in Kazakhstan» belgisi bar ónimderdiń keńeıtilgen katalogymen tanysa alady.
export.bgov.kz mekenjaıynda jumys isteıtin júıede qazaqstandyq óndirýshiler usynatyn taýarlar men qyzmetterdiń sıpattamasy, negizgi tehnıkalyq parametrleri men tutynýshylyq qasıetteri qamtylǵan. Negizgi nazar naqty ónimderge aýdarylyp, áleýetti seriktesterge qajetti aqparatty bir jerden tabýǵa múmkindik jasalǵan.
Otandyq ónimder dúken sórelerinde qashan tórge ozady?
Platformadaǵy ónimder bes negizgi salaǵa toptastyrylǵan. Olardyń qatarynda jeńil ónerkásip, azyq-túlik pen hımııa ónerkásibi, agroónerkásiptik keshen ónimderi, metallýrgııa, mashına jasaý men qurylys salasy bar. Izdeý júıesi kilt sózder arqyly qajetti taýardy tez tabýǵa jaǵdaı jasaıdy. Paıdalanýshy belgili bir ónimdi izdegen jaǵdaıda júıe sol sanattaǵy barlyq usynysty kórsetedi. Árbir taýar kartochkasynda ónim týraly tolyq málimet berilip, sol taýardy óndirýshi kompanııanyń profıline birden ótý múmkindigi qarastyrylǵan.
Otandyq ónimder álemdik naryqqa tanystyryldy
«Atalǵan platformada tek agenttik tarapynan tekserýden ótken, verıfıkasııalanǵan óndirýshiler ǵana usynylǵan. «EKA teksergen» mártebesi senimdiliktiń kepili retinde qyzmet atqaryp, táýekelderdi azaıtady ári qazaqstandyq eksporttaýshylar men sheteldik satyp alýshylar arasyndaǵy ózara is-qımyl barysynda senimdi nyǵaıtady», dedi Qazaqstannyń eksporttyq-kredıttik agenttigi Basqarma tóraǵasynyń orynbasary Madına Erjanova.
Tutynýshylardyń otandyq ónimge senimi artyp keledi – saýalnama
«Eksporttaýshylar vıtrınasy» jobasy otandyq bıznes pen halyqaralyq naryqtar arasyndaǵy sıfrlyq kópirge aınalýdy kózdeıdi. Platforma jetkizýshilerdi izdeý úderisin jeńildetip, qazaqstandyq brendterdiń sheteldegi tanymaldyǵyn arttyrýǵa yqpal etedi. Bastama «Báıterek» ulttyq ınvestısııalyq holdıngi júzege asyryp otyrǵan shıkizattyq emes eksportty qoldaý men syrtqy ekonomıkalyq qyzmetti sıfrlandyrý baǵyty aıasynda qolǵa alynǵan.