Aqjaıyqta aýyl sporty damyp keledi

Basqarmanyń esebine qaraǵanda, ótken jyly óńirde 2982 sporttyq-buqaralyq is-shara ótken eken. Iаǵnı, jyl boıy úzilissiz kún saıyn 8-9 shara ótip turǵan. Bul jarystarǵa 155 340 adam qatysypty. Al 2019 jyldyń I toqsanynda 51772 adam qatysqan 1052 sporttyq-buqaralyq is-shara ótken. 

– О́tken jyldyń osy kezeńimen salystyrǵan ótkizilgen is-sharanyń sany 380-ge, al qamtylǵan adam sany 12291-ge artty, – deıdi Ásııa Rahymqyzy.

Sońǵy kezde buqaralyq sportty damytý maqsatynda kópshilik júgirýler men túrli spartakıadalar kóbeıdi. My­saly, Jeńis kúnine arnalǵan kóp­shilik júgirýge 1000-ǵa jýyq adam qatyssa, Qazaqstan Respýblıkasynyń mem­le­ket­tik qyzmetshiler kúni merekesine ar­nalǵan kópshilik júgirý syny 600 sportshynyń basyn qosty. Sondaı-aq Astana qalasynyń 20 jyldyǵyna ar­nalǵan «Aqjaıyq dýatlon-2018» jarysy sportsúıer qaýymnyń úlken qyzy­ǵýshylyǵyn týǵyzdy. Bul jarysta 500 sportshy baq synady.

Sportshynyń velosport pen jeńil atletıkanyń qosyndysy sanalatyn dýatlon jarystary aldaǵy ýaqytta dástúrli túrde ótkizilmek. 

Bıylǵy alty aıdyń ózinde oblys­ta bokstan Olımpıada chempıony D.Eleýsinovtiń júldesine halyqaralyq týrnır, voleıboldan joǵary lıga erler jáne áıelder komandalary arasynda Qazaqstan Respýblıkasy chempıonatynyń III týry, sambo, dzıýdo, baıdarka men kanoe esýden jáne voleıboldan erler men áıelder komandalary arasynda Qazaq­stan Respýblıkasynyń V jazǵy Spar­ta­kıadasy syndy sporttyq sharalar ótti. 

Basqarma basshysy aıtqandaı, aýdandarda buqaralyq sportty damytý jolǵa qoıylǵany baıqalady. Byltyr Astana qalasynyń 20 jyldyǵyna oraı barlyq aýdanda veloestafeta uıymdastyrylyp, máresi «AQJAIYQ DUATHLON-2018» ja­rysymen támamdalǵan edi. 

– Aýdan turǵyndaryn deneshy­nyq­tyrý jáne sportpen aınalysýǵa tartý, mektep oqýshylarynyń sportqa qyzy­ǵýshylyǵyn arttyrý maqsatynda aýdan ortalyqtarynda oblys chempıonattaryn, respýblıkalyq týrnırlerdi ótkizý tájirıbesi qolǵa alyndy, – deıdi Ásııa Amanbaeva. 

Máselen, 2018 jyly Bórli aýdany sam­bodan 2002-2003 jyldary týǵan jas­óspirim uldar men qyzdar arasyndaǵy Qazaqstan Respýblıkasynyń chempıo­natyn jáne aýyl jasóspirimderiniń II jazǵy oıyndary jáne voleıboldan áıelder arasyndaǵy oblys birinshiligin, «Qazaqstan Barysy» týrnıriniń oblystyq kezeńin uıymdastyrdy. Al Báıterek aýdany voleıboldan erler, áıelder komandalary arasynda, gir sportynan jas­tar arasynda jáne sporttyq karateden oblys chempıonattaryn joǵary deńgeıde ótkizdi. Aqjaıyq aýdany voleıboldan jasóspirim qyzdar jáne áıelder arasynda, taý týrızmi tehnıkasy men sporttyq shyń­ǵa órmeleý sportynan, Jańaqala aý­dany toǵyzqumalaqtan jasóspirimder arasynda, Jánibek aýdany voleıboldan jasóspirim uldar arasynda, Qaztalov pen Syrym aýdandary aýyr atletıkadan jasóspirimder arasynda, Tasqala aýdany voleıboldan jasóspirim uldar arasynda, Shyńǵyrlaý aýdany ulttyq at sport túrlerinen oblys chempıonattaryn ótkizdi. Bul chempıonattardyń árbiri jergilikti jankúıerlerdiń yqylasyna bólendi. 

Aýyldyq jerde sport uıymdarynyń materıaldyq-tehnıkalyq bazasyn nyǵaı­týǵa da kóńil bólinip keledi. 2018 jyldyń qazan aıynda KPO b.v. kompanııasynyń esebinen Bórli aýdany Bórli aýylynda deneshynyqtyrý-saýyqtyrý kesheni salynyp, paıdalanýǵa berilse, sol jyly jergilikti bıýdjet esebinen 49 sporttyq alań salyndy. Onyń 36-sy aýdandarda. Mysaly, Aqjaıyq aýdanynda – 8 alań, Bókeı ordasy aýdanynda – 1 alań, Bórli aýdanynda – 3 alań, Jańaqala aýdanynda – 4 alań, Jánibek aýdanynda – 1 alań, Báıterek aýdanynda – 6 alań, Qaztalov aýdanynda – 5 alań, Syrym aýdanynda – 2 alań, Tasqala aýdanynda – 6 alań jáne Oral qalasynda 13 alań paıdalanýǵa berilgen.

Qazaqstan Respýblıkasy Mádenıet jáne sport mınıstrligi elimizde 2019-2021 jyldary kezeń-kezeńimen 100 dene­shynyqtyrý-saýyqtyrý keshenin salý jo­basyn bekitken bolatyn. BQO-da bul jos­parǵa sporttyq ınfraqurylymdy damytýǵa muqtaj 7 eldi meken engen. Sonyń ishinde Jánibek jáne Jańaqala aý­dan­darynda 2 keshen qurylysy QPO b.v. kompanııasy esebinen salynatyn boldy. 

2020-2021 jyldar aralyǵynda Cha­paev, Qaztalov, Tasqala kentterinde 320 oryndyq deneshynyqtyrý-saýyqtyrý kesheni, Jalpaqtal selosynda 160 oryndyq DShSK,

Shyńǵyrlaý kentindegi 160 oryndyq ashyq stadıon salynbaq. Budan bólek, Saıhyn jáne Podstepnyı aýylyna 160 orynǵa arnalǵan dene­shynyqtyrý-saýyqtyrý keshenin salý boıynsha jobalyq-smetalyq qujat jasaqtalýda. 

– Biz 2019 jyldyń sońyna deıin oblys aýmaǵynda 76 sporttyq alań salyp, paıdalanýǵa beremiz. Onyń 66-sy aýdandarda jáne 10 alań oblys ortalyǵynda bolady, – deıdi Batys Qazaqstan oblystyq deneshynyqtyrý jáne sport basqarmasynyń basshysy Ásııa Amanbaeva. Batys Qazaqstan oblysynda sport­tyń 77 túri damyp keledi. Onyń 32-si olımpıadalyq sport túrine kiredi. Son­daı-aq balalar-jasóspirimder sport mektepterinde 47 sport túri jumys jasaıdy. Onyń 30-y – aýyldyq jerde. 

О́ńirdegi bir jańalyq – 2017 jyldyń sońynan bastap sport túrlerin saralaý júıesi iske qosyldy. Bul júıeniń basty maqsaty sybaılas jemqorlyqtyń aldyn alyp,

bólingen qarjynyń ashyqtyǵyn kórsetý jáne sportshylardyń daıyn­dyǵyn júıeleý. Osy aralyqta óńir sportshylary qatysatyn jarystar birizdendirildi. Sport túrimen aınalysýshylar sany, materıaldyq bazasynyń bolýy, bapkerlik quramnyń tolyqtyǵy jáne jetistigine qaraı saralanyp, «A», «V», «S» tobyna bólindi. «Bul júıe qazirdiń ózinde jemisin berdi. Eń bastysy júıesizdikten qutyldyq. Sondaı-aq bapkerler quramy da jylyna neshe jarysqa baratynyn josparlap, shákirtteriniń babyn qadaǵalaýǵa múmkindik aldy», deıdi basqarma basshysy. 

Oblys boıynsha sport uıymdarynda 569 jattyqtyrýshy qyzmet atqarady. Onyń 316-sy aýyldyq jerdegi 23 balalar-jasóspirimder sport mektebinde aýyl balalaryna qyzmet etedi. Aýyl sportyna kóńil bólinip, júıeli jumys júrýiniń nátıjesinde olarǵa sporttyq razrıad berilýi artty. Aıta ketsek, Bókeı Orda aýdany 2017 jyl boıy bar-joǵy 13 sport­tyq razrıad alyp, eń tómen orynda bolsa, 2018 jyly 179 sporttyq razrıad berilip, oblystaǵy eń joǵarǵy kór­set­kishke qol jetkizdi. 

Aýyl sporty demekshi, byltyr Aq­jaıyq aýdanynda taekvondo, grek-rım, dopty hokkeı bólimsheleri ashylsa, Bórli aýdanynda dopty hokkeı, shańǵy sporty, jeńil atletıka, Bókeı Ordasy aýdanynda asyq atý, Jánibek aýdanynda boks jáne aýdaryspaq bólimsheleri, Jańaqala aýdanynda ulttyq sport túrleri, jeńil atletıka, erkin kúres, Qaztalov aýdanynda erkin kúres, dzıýdo, Báıterek aýdanynda sporttyq baǵdarlaý, qol kúresi, Tasqala aýdanynda badmınton, ulttyq jekpe-jek bólimsheleri, Terekti aýdanynda qol doby, dopty hokkeı, Syrym aýdanynda voleıbol, qol kúresi, Shyńǵyrlaý aýdanynda dopty hokkeı, fýtbol, Oral qalasynda sadaq atý, belbeý kúresi, trıatlon bólimsheleri ashyldy. Bul sport túrlerine 1000-ǵa jýyq bala tartylǵan.

Búgingi tańda oblysta Qazaqstan Respýblıkasynyń ulttyq qurama sapyna engen 433 sportshy bar. Olardyń 350-i – jazǵy, 83-i – qysqy sport túrlerinen. 

Jalpy 2018 jyly oblys sportshylary sport túrleri boıynsha resmı respýblıkalyq jáne halyqaralyq jarystarda, atap aıtqanda, Álem, Azııa, Qazaqstan Respýblıkasynyń chempıo­nattarynan 647 medal jeńip alǵan. Onyń 218-i – altyn bolsa, 178-si – kúmis, 251-i – qola. Al bıylǵy jyldyń bes aıynda sportshylarymyz barlyǵy 572 medal jeńip úlgerdi. Olardyń 215-si – altyn, 153-i – kúmis, 204-i – qola.

– Joǵary jetistikter sportynyń aldaǵy basty jospary – 2020 jyly Tokıo qalasynda ótetin HHHII jazǵy olımpııa oıyndaryna lısenzııa utyp alý. Búginde oblysta Tokıoǵa barady degen 14 úmitker bar. Olar – baıdarka men kanoe esý sheberleri Alekseı Dergýnov pen Andreı Ergýchev, akademııalyq esý sportynyń bilgirleri Evgenıı Taseı men Danııl Savchenko, sadaqshy Anastasııa Bannova, Alına Ilıasova jáne Álıhan Mustafın. Olımpııa oıyndarynyń qola júldegeri Ekaterına Larıonova da óziniń ekinshi olımpıadasyna barǵysy keledi. Sondaı-aq dzıýdoshy Ańsarbek Ǵaınýllın men Temirlan Kólbaı da el namysy synǵa túser shaqta aıanyp qalmaıtyny anyq. Jeńil atletterimiz Grıgorıı Sheıko men Polına Repınanyń da olımpııa oıyndarynda el namysyn qorǵaı alatyndaı qaýqary bar. Ústel tennısiniń sheberleri Gýlchıhra Hýseınova men Aıdos Kenjeǵulov olımpıada joldamasyn alar degen senim mol, – deıdi Ásııa Rahymqyzy qoshtasarda.

Batys Qazaqstan oblysy