Tula boıy kreatıvke toly jastar bizdiń elde kóp. Startap jobalar usynyp, jeke kásibin bastap, ol kásibinen násip taýyp júrgender jetip-artylady. Qazaqstanda Jastar jylyn ótkizýge qatysty Jol kartasy aıasynda ótip jatqan «Zeren-2019» jazǵy lageri osyndaı jastardyń ıdeıasyn qoldap, bıznes jobalarynyń júzege asýyna kómek qolyn sozady.
Bul tanymdyq jazǵy lager Aqparat jáne qoǵamdyq damý mınıstrliginiń uıytqy bolýymen osymen ekinshi jyl uıymdastyrylyp otyr. Bul joly lagerge Qazaqstan jastarynan bólek Reseı, Qytaı jáne Mońǵolııa jastary da qatysty. Jalpy, jobaǵa qatysýshylardan 1000-nan asa ótinim kelip tústi. Sharanyń úsh maýsymy boıynsha 18-29 jas aralyǵynda 600 qatysýshy irikteldi. Alǵashqy maýsymǵa 200 talapker qatysyp, 36 komandalyq joba usynyldy. Onyń qorytyndysy boıynsha 5 bıznes-ıdeıa úzdik dep tanylyp, olardy Premer-Mınıstrdiń orynbasary Gúlshara Ábdiqalyqova marapattady. Júldeli 3-oryn alǵan eki topqa 750 myń teńgeden berilse, 2-oryn alǵan eki komandaǵa 1 mln teńgeden úlestirildi. Al birinshi oryn alǵan qyzylordalyq topqa 1 500 000 teńgeniń sertıfıkaty tabystaldy. Budan bólek, jastar jobalary demeýshiler tarapynan 1 mln teńge kóleminde qosymsha qarjylandyryldy.
Jeńimpaz «Red Orda» tobynyń múshesi Nurjan Amandyqtyń aıtýynsha, júlde tolyǵymen jobanyń júzege asyrylýyna jumsalady. Bul top «Jońyshqa – tabıǵı tyńaıtqysh» taqyrybynda joba usynǵan. Olar Qyzylorda jerinde ósip jatqan jońyshqanyń basqa óńirlerde de ósirilýin alǵa tartyp, elimizdegi jasyl ekonomıkany damytýdy kózdep otyr. Joba jumysy Qazaqstan jerin qalaı tyńaıtýǵa bolady, ol úshin qansha shyǵyn qajet, naqty qansha paıda ákeledi degen syndy suraqtarǵa jaýap qarastyrǵan. Jerdi tyńaıtyp, keler jyly kúrish, bıdaı, qaýyn, qarbyz egý jumystaryn damytsaq, bizdiń maqsattyń oryndalǵany deıdi jeńimpaz top.
«Bizge úzdik mentorlar men trenerler dáris oqydy. Sabaqtardan bólek motıvasııalyq trenıngter men sporttyq saıystar da ótti. Sondaı-aq bul lagerden jaqsy dostar taptyq. Reseı, Qytaı jáne Mońǵolııadan kelgen qatysýshylardan da úırenerimiz kóp boldy. Biz, «Red Orda» toby, jasyl ekonomıka baǵyty boıynsha joba qorǵadyq. Bizden bólek ózge komandalar ártúrli taqyrypta jobalar usyndy. Olardyń ishinde azamattyq qoǵam, jeke kásipkerlik, kreatıvti ekonomıka jáne jańa medıa syndy túrli baǵytta myqty jobalar boldy. «Zeren» jastar tanymdyq lageri – kil myqtylardyń tyń ıdeıalary toǵysqan orta der edim» dedi Qyzylorda oblysy Jalaǵash aýdany Jastar resýrstyq ortalyǵynyń keńesshisi Nurjan Amandyq.
Uıymdastyrýshylardyń aıtýynsha, keler jyly joba jeńimpazdary qaıta kezdesedi. Olar ol kezdesýde júzege asqan jobalary jaıynda áńgime órbitedi. Lagerdegi úsh aýysymnyń qorytyndysy boıynsha úzdik 30 joba qarjylandyrylady. Jalpy júlde qory – 15 mln teńge.