30 mamyrda «Abaı Qunanbaıulynyń 175 jyldyq mereıtoıyn merekeleý týraly» Prezıdent Qasym-Jomart Toqaevtyń Jarlyǵy shyqqany belgili. Uly aqynnyń mereıtoıyn ótkizý jónindegi memlekettik komıssııanyń quramyna Parlament depýtattary Baqytjan Jumaǵulov pen Saýytbek Abdrahmanov, kórnekti qalamgerler, qoǵam qaıratkerleri Oljas Súleımenov, Rollan Seısenbaev, Murat Áýezov, ortalyq memlekettik organdardyń basshylary, akademııalyq jáne shyǵarmashylyq qoǵam ókilderi engen bolatyn.
Premer-Mınıstrdiń orynbasary otyrystyń ashylýynda Elbasy Nursultan Ábishuly Nazarbaevtyń «Abaı – álem moıyndaǵan dana ustaz, aqyn jáne adamzattyń danyshpany. Danyshpan Abaıdyń ulylyǵy men ereksheligi, tabandylyq pen maqsattylyqty dáriptep jáne ony óz ultynyń sanasyna engize otyryp, ulttyq rýhty buryn-sońdy bolmaǵan bıikke kóterdi. Biz Abaı sııaqty maqtan tutatyn rýhanı tiregimizdiń baryna alǵys aıtýymyz kerek» degen sózine kóńil aýdardy.
«Búgin elimizde saıası-ekonomıkalyq jáne rýhanı damýǵa baǵyttalǵan «Rýhanı jańǵyrý» baǵdarlamasy men «Uly dalanyń jeti qyry» maqalasy aıasynda qolǵa alynyp otyrǵan sharalar halyqtyń rýhanı damýyna negiz bolyp otyr. Uly Abaıdyń shyǵarmashylyǵy qazirgi tańda jastar arasynda Otanǵa, tilge, eńbekke degen súıispenshilikti arttyrady. Aqynnyń mereıtoıyn toılaý halyqtyń rýhanı jáne adamgershilik damýyna óz úlesin qosady», dedi G.Ábdiqalyqova.
Mereıtoı aıasynda halyqaralyq, respýblıkalyq jáne óńirlik deńgeıde 500-ge jýyq is-shara ótkizý josparlanyp, komıssııa otyrysynda olardy uıymdastyrý jaǵy talqylandy. Atap aıtar bolsaq, Nur-Sultan qalasynda halyqaralyq ǵylymı-tájirıbelik konferensııa uıymdastyrylyp, Parıjdegi IýNESKO-nyń shtab-páterinde «Abaı» kórkem fılmi kórsetilmek. Sonymen qatar Abaı shyǵarmalaryn shetel tilderine aýdarý, Abaı úıi-mýzeıiniń jan-jaqty tanystyrylymy, «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵynyń ǵylymı-restavrasııalyq jumystaryn júrgizý, Abaıdyń ákesi Qunanbaıdyń tulǵalyq mańyzy men tarıhı-mádenı rólin arttyrý kózdelip otyr. Buǵan qosa búginde áleýmettik jelilerde sátti iske asyrylǵan #Abai175 chellendji jahandyq formatta jalǵasyn tappaq.
Otyrys sońynda Premer-Mınıstrdiń orynbasary G.Ábdiqalyqova memlekettik organdarǵa birqatar tapsyrma berdi.