Túrkistanǵa kelgen týrısterdiń estelik retinde óz eline kádesyı áketip jatatyny zańdy. Elimizdiń ózge óńirlerinen zııarat jasaýǵa kelgender de qurqol qaıtpaıdy. Osy oraıda ásirese sheteldikterdiń terrakot (kúıdirilgen balshyq) kádesyılarǵa ańsary kóbirek aýady eken. Sheteldikter qyzyǵatyn, sazdan jasalǵan balbal, sazsyrnaı, qumyralar alystan ákelinbeıdi, árıne kıeli qaladaǵy sheberler ortalyǵynda jasalady.
Qazaqstan qolónershiler odaǵynyń múshesi Abaıhan Rysbaevtyń aıtýynsha, sheberler ortalyǵyna sheteldikter jıi keledi. Olarǵa qolónershiniń minsiz jasaǵan ónimine qaraǵanda, aıqysh-uıqysh bolsa da ózi jasaǵan buıym tańsyq. «Qumyra jasaıtyn urshyqqa otyryp, sazdan buıym shyǵarǵysy keledi. Basym bóligi keseniń pishimin shyǵarýǵa tyrysady. Kóptegen memleketterde art-terapııa keń taraǵan. Iаǵnı, adamnyń psıhıkasyndaǵy kúızelisti óner arqyly jeńýge tyrysady, glınoterapııa sheteldikterdi erekshe qyzyqtyrady. Saz-topyraqpen fızıologııalyq emdelý de paıdaly. Kórmelerge shaqyrtý alyp, Fransııa, Taıland sekildi elderge barǵanymda arhıtektýralyq eskertkishten tys adamdardy qolóner buıymdary qatty qyzyqtyratynyn ańǵardym. Qumyra jasaıtyn urshyǵymdy óz dúńgirshegime qoıamyn da, qonaqtardyń kózinshe ydys jasaımyn. Sheteldikter erekshe yqylasy aýyp, qyzyǵýshylyq tanytady», deıdi sheber.
Almaty kórkemsýret ýchılıshesiniń keramıka fakýltetin bitirgen Abaıhan aǵa qaıta jańǵyrtý sheberhanasynda, ıaǵnı restavrasııa salasynda jumys istep keledi. Restavrasııamen qatar qumyra jasaıdy. Sheberdiń aıtýynsha, ár ulttyń ózine tán minezi, mentalıteti qolónerde aıqyn kórinedi. «Túrkistandaǵy qazba jumystary kezinde tabylǵan ydystar formalyq turǵyda erekshe. Qazba jumystarynan tabylǵan turmystyq buıymdardan talǵamdy baıqaımyz. Buıymdar terrakot kúıinshe qalady. Nemese ańdar men ósimdikter beınelenedi. Kádesyı jasaǵanda baǵzy zamanǵy sheberlerdiń talǵamymen sanasamyn. Ulttyń bolmysynan, tarıhynan derek beretin kádesyı árqashan trendtte», deıdi A. Rysbaev.
Qolóner adamdy ishki bolmystyń úılesimdiligine jeteleıdi dep esepteıtin sheberdiń aıtýynsha, kilem toqý, kóze, qumyra, kıizden túrli buıym jasaý shetel azamattaryna qyzyqty.
Túrkistan oblysy