Keshe áleýmettik jelilerde Alakól jaǵalaýynda demalýshylar túsirgen beınejazba taralyp, onda aıdynǵa sýǵa qubyr arqyly las sýdyń qosylyp jatqany kórinis tapqan edi. Búgin beınejazbalarda kórsetilgen jaǵdaı boıynsha Almaty oblysy, Alakól aýdanynyń ákimdigi tarapynan arnaıy komıssııa qurylyp, bolǵan jaıdyń sebep-saldary anyqtaldy.
Málim bolǵandaı, kól arnasyna quıylǵan sý jaǵajaıdaǵy «Kóktem Grand» demalys orynynyń basseıninen aqqandyǵy anyqtaldy. Arnaıy qurylǵan komıssııa anyqtaǵandaı, aıdynǵa quıylǵan sý áleýmettik jelide shý bolǵandaı ájethana men ashana qubyrynan aqqan qaldyq sý emes, shomylýǵa arnalǵan basseıinge tartylǵan qubyr sýy eken.
- Sorǵyshtan aqqan sý toqtady, kól jaǵalaýy taza. Beınejazbadaǵy aqqan sý eshqandaı hlorsyz, taza basseınniń kólden alynǵan sýy. Sý soratyn sorǵysh sol ýaqytta isten shyqqandyqtan, ishke alynatyn sý keri qaıtqan. Al demalys orynynyń dárethana qubyry bólek jerde ornalasqan. Qazir Aýdandyq taýarlar men kórsetilgen qyzmetterdiń sapasy men qaýipsizdigin baqylaý basqarmasynyń mamandary qazirgi ýaqytta zerthanalyq synamalar alýda, - dedi oqıǵaǵa oraı túsinik bergen Alakól aýdany ákiminiń orynbasary Aıdyn Chalkenov.
Aıdyn sýynyń lastanýyna sebepker bolǵan «Kóktem Grand Resorts» qonaqúı kesheni ótken jyly ashylǵan edi. Bir maýsymda 30 myń adamdy qabyldaı alatyn demalys oryny aımaq boıynsha 4 mlrd teńge ınvestısııa quıylǵan, zamanǵa saı qyzmet kórsetetin jalǵyz keshen bolyp otyr.
Jalpy, ótken jylǵy demalys maýsymynda Jetisý óńirine ortasha eseppen 2 mln týrıst kelgen eken. Onyń ishinde 1 mln adam Alakól jaǵalaýynda demalǵan. Bul kórsetkishter Almaty oblysyndaǵy týrıstik qyzmet kórsetý jumystarynyń jaqsaryp, aımaqqa kelýshiler qatarynyń 22,2 paıyzǵa óskenin aıǵaqtaıdy. Jalpy 2018 jyly óńirde 19 mlrd teńge jumsalyp, 44 týrıstik nysan paıdalanýǵa berilgen. Onyń ishinde 33 nysan Alakóldiń jaǵalaýynda iske qosylypty. Al týrızm salasyndaǵy qyzmet kórsetý quny 12,9 mlrd teńgege jetken. Sondaı-aq ótken jyly Almaty oblysyndaǵy demalys oryndary 721,4 myń týrıstke qyzmet kórsetken. Bir ǵana servıstik qyzmetten túsken tabys mólsheri 8,7 mlrd teńgeni qurapty. Alaıda oblystyń týrıstik áleýeti joǵary bolǵanymen, demalýshylardyń kóńilinen shyǵatyn servıstik qyzmet kórsetý jaǵy áli de jetildirýdi qajet etedi. Týrızm ınfraqurylymynyń damýyna bólingen qarjy jyl saıyn kóbeıip otyrǵanymen, nátıje baıaý.
Jyldar arasyndaǵy kórsetkishterdi saraptaǵan mamandar bıylǵy maýsymda Alakól jaǵalaýyna taǵy 1,5 mln adamnyń kelýi yqtımal ekenin aıtqan edi. Demek kóktemde jasalǵan osy boljamdy meje boıynsha oblys aldynda 2,5 mln týrıstke qyzmet kórsetý mindeti tur. Ásirese, kól jaǵalaýyna keletin sheteldik týrısterdiń sany jyl saıyn kóbeıip keledi. Bul qyzmet kórsetý naryǵynyń jaýapkershiligin eki esege arttyrýǵa tıis. Dál osy jerde shaǵyn jáne orta kásip ıeleriniń paıda tabýy men kásibı iskerligi synalatyn sııaqty. Al atqarýshy bılik Alakól jaǵalaýyndaǵy ınfraqurylymdy damytý jumystaryn júıeli júrgizip keledi. Aqshı aýylynan demalys oryndaryna deıingi joldardy qaıta jańartý boıynsha qurylys-montajdaý jumystary tolyqtaı aıaqtalǵan. 23,8 shaqyrym joldaǵy qurylys jumysyna 3,036 mlrd teńge qarjy jumsalǵan. Munan bólek, demalys aımaqtaryna aparatyn taraý joldarǵa da kúrdeli jóndeý jasalypty. Munyń syrtynda jaǵajaıdaǵy jaryqtandyrý, jaıaý júrginshi jolyn salý, sý ótkizgish qubyrlar men aryqtar júrgizý baǵytyndaǵy jumysqa 50 mln teńge qarajat qarastyrylyp, ıgerilýde.
Almaty oblysy