Qaraǵandy oblysyndaǵy Qarqaraly, Osakarov jáne Aqtoǵaı aýdandary aýmaǵynda dala órtenip, órt sóndirýshilerdi áýre-sarsańǵa salyp jatyr.
Negizi, daladaǵy órtti sóndirý jergilikti atqarýshy bıliktiń moınyndaǵy sharýa bolsa da, oblystyq tótenshe jaǵdaılar departamentiniń bólimsheleri kómekten qashqan emes. Mysaly, osynyń aldynda ǵana Buqar jyraý aýdanynyń Novostroıka aýylynan shyǵysqa qaraı 10 shaqyrym jerde 45 gektar aýmaqtyń qurǵaq shóbi otqa oranǵanda ony sóndirýge oblystyq TJD bólimsheleriniń 25 qyzmetkeri men 5 tehnıka birligi jumyldyrylǵan bolatyn.
Aıta ketý kerek, órt kóbinese tehnıka bara almaıtyn qıyn jerlerde shyǵady. Usaq shoqylar men butalar órtti sóndirýge kedergi keltirse, jel men qurǵaq shóp tilsiz jaýdyń órshýine tikeleı sebepker bolyp jatady. Otpen alysqan órt sóndirýshiler keı jaǵdaılarda sýdy birneshe shaqyrym jerden tasýǵa májbúr bolady. Nege deseńiz, qazirgideı qurǵaqshylyq kezde mańaıdaǵy ózender men bulaqtardyń kóbiniń sýy tartylyp qalǵan.
Jyl basynan beri oblysta 241 dala órti bolyp, onyń 187-si TJD bólimsheleriniń kómegimen sóndirildi. О́rt shalǵan aýmaqtyń kólemi 7 myń gektardan asady.
Jasyratyny joq, daladaǵy órttiń basym bóligi adamdardyń jaýapsyzdyǵynan, nemquraıdylyǵynan bolyp jatady. Shala sóndirilgen ot, shylymnyń tuqyly, byqsyǵan qoqys... osynyń bári kún ystyqqa órttiń shyǵýyna sebepshi bolady. Tipti, laqtyra salǵan shyny synyǵynyń ózi kún kózi túskende qurǵaq shóptiń tutanýyna ákep soqtyrady. Sol sebepti, tabıǵat aıasynda júrgende ot jaǵý máselesine óte jaýapkershilikpen qaraǵan jón.
Qaraǵandy oblysy