Oblys ortalyǵynyń turǵyndary Ertis, Ýsolka ózenderiniń jaǵalaýlaryn, qala mańaıyn qoqystan tazartýǵa qatysty.
Senbilikke memlekettik organdar men mekeme uıymdardyń, Úkimettik emes uıymdardyń ókilderi, «Jasyl el» jáne «Jas Otan» jastary qatysty.
Buǵan deıin elimizde jańadan qurylǵan Ekologııa mınıstrligi tazalyq sharasyn ótkizýdi usyndy. Bul sharaǵa barlyq oblystar men turǵyndar qosyldy.
«Birge – taza Qazaqstan» tazalyq sharasyna qatysýshylardy quptaǵan oblys ákimi Bolat Baqaýov qorshaǵan ortaǵa qorǵaýǵa shaqyrdy.
«Búgin barlyq aýdandar men qalalarda «Birge - taza Qazaqstan» sharasy ótýde. Byltyr óńirde jarııalanǵan Ekologııa jyly balalardy mektep qabyrǵasynan bastap qoqys jınaýǵa úırettik», deıdi B. Baqaýov. Tazalyq sharasynyń maqsaty – turǵyndardy ormandardy, sý qoımalaryn, jaıylmalardy, demalys oryndaryn qoqyspen lastamaýǵa shaqyrý, qorshaǵan ortaǵa uqypty qaraýdy nasıhattaý.
Tazalyq sharasyna qala turǵyndary otbasylarymen keldi. Al kvadrasıklıster klýbynyń 15 múshesi qoqysty shyǵarý úshin tehnıkalarymen kelipti.
«Jaǵalaýdan plastık bótelkeler toly on shaqty qap shyǵardyq», deıdi kásipker Vıktor Romaker.
Oblystyq Jer qoınaýyn paıdalaný, qorshaǵan orta jáne Sý resýrstary basqarmasy habarlaǵandaı, oblys ortalyǵynda ótken Ekologııalyq senbilikte 1300 tonna qoqys jınalǵan.
Pavlodar oblysy