Shymkenttegi jumys saparynda Parlament Senatynyń depýtaty Nurlan Beknazarov osylaı dep málimdedi. «Belsendi ómir súrý» ortalyǵyna baryp, ondaǵy eńbek ardagerlerimen júzdesken Parlament Senatynyń depýtattary Nurlan Beknazarov pen Aıgúl Qapbarova respýblıkalyq mártebe alǵan shahardaǵy áleýmettik máselelerdiń jaı-kúıine qanyqty.
Megapolıske bir ortalyq azdyq etedi
«Elbasy Nursultan Nazarbaevtyń otandastarymyzdyń ómir súrý jasyn uzartý men buqaralyq sportty damytý boıynsha tapsyrmasy aıasynda, Memleket basshysynyń azamattardy áleýmettik qorǵaý týraly tapsyrmalaryna sáıkes ashylǵan ortalyqta ardagerlerge barlyq múmkindik jasalǵan. Ortalyqta demalýǵa sensorlyq bólmeden bastap trenajer, ústel tennısine deıin uıymdastyrylypty. Biraq mıllıon turǵyny bar megapolıske bir ǵana ortalyq azdyq etedi», dedi Nurlan Qudııaruly.
Halyq qalaýlylary «Belsendi ómir súrý» mekemesindegi «Asyl Mıras» aýtızm ortalyǵynyń tynys-tirshiligimen tanysty. Bul ortalyqta Nur-Sultan, Almaty qalasynan arnaıy shaqyrylǵan mamandardyń basshylyǵymen qaladaǵy aýtızm dertine shaldyqqan 60-qa jýyq azamat emdelýde. Bul ortalyq bolashaqta tolyqqandy iske qosylǵanda 150-den asa emdi qajet etetin azamattarǵa joǵary sapaly medısınalyq qyzmet kórsetetin bolady.
Qoǵamdyq keńeske ákimdik ókilderi nege kirgen?
Senat depýtattary sapar barysynda qoǵamdyq keńes ınstıtýtynyń jumysyn jetildirý, memlekettik baǵdarlamalardyń oryndalýyn saraptamalyq baqylaý máseleleri boıynsha oı bólisti. Jıynda keńes múshesi J.О́tegen Senat depýtattaryna ne sebepti Qoǵamdyq keńestiń quramynda ákimdik ókilderiniń saılanǵany, 21 myń teńge AÁK alýǵa qujat tapsyrý úshin jumyspen qamtý ortalyǵyndaǵy qıyndyqtar jáne jekemenshik balabaqshalardaǵy olqylyqtar jóninde óz suraqtaryn qoıdy.
Nurlan Beknazarov óz sózinde Qoǵamdyq keńestiń quramyn zańǵa sáıkes máslıhat bekitetinin jáne onyń quramynyń sanyna shekteý qoıylmaıtynyn, ıaǵnı erejeni saqtaı otyryp, qoǵamdyq keńestiń músheligine qajet úmitkerlerdi qosymsha engizýge bolatynyn jetkizdi. «Áleýmettik kómek alýǵa úmitkerler sanynyń kúrt ulǵaıýy, qujattardy irikteıtin arnaıy kompıýterlik baǵdarlamanyń osy kúnge deıin tolyqqandy jumys istemeýi jumyspen qamtý ortalyǵynyń isin baıaýlatqan. Jaýapty basqarma atalǵan problemany retke keltirýde. Al kezinde «Balapan» baǵdarlamasy qabyldanǵanda olardyń sanyn kóbeıtý maqsatynda bólingen ǵımarattarǵa kóp mán berilmegeni ras. Alaıda, sońǵy jyldary bul másele de jolǵa qoıylyp kele jatqanyn kórip júrmiz», dedi N.Beknazarov.
Baspana máselesi – basty nazarda
Senatorlar Shymkent qalasynda salynyp jatqan kópqabatty turǵyn úı qurylysy barysymen tanysty. «Shymkent city» qalashyǵyndaǵy «Nurly jer» baǵdarlamasy aıasynda az qamtylǵan azamattar men jastarǵa arnalǵan kópqabatty úılerdiń sapasyn kórip, merzimdi aıaqtalýy boıynsha málimet aldy.
«Bıyl Shymkentte 16 arendalyq, 11 nesıelik páter tapsyrylady. Bul úıler jastarǵa, kóp balaly otbasylarǵa, jalǵyzbasty analarǵa, múmkindigi shekteýli azamattarǵa beriledi. Qazirgi tańda Turan shaǵyn aýdanynda 68 turǵyn úı 5556 páterdiń jobalyq-smetalyq qujattamalaryn ázirlep jatyrmyz. Jýyrda ol úılerdiń de qurylysy bastalady. Odan bólek jeke kásipkerler turǵyn úı salamyn dep nıet bildirse, onyń ınfraqurylymyn memleket júrgizip berýge daıyn. Búgingi tańda arendalyq turǵyn úıge 37141 adam kezekte tur», dedi Shymkent qalasy Qurylys basqarmasy basshysynyń mindetin atqarýshy Ǵ.Ýtenbaev.
Alaıda, jańadan salynǵan úılerde áli de ınfraqurylym máselesi tolyq sheshimin tappaǵan. Ásirese kógildir otynmen qamtamasyz etý jaǵy aqsap tur.
ShYMKENT