Almas Nurǵojaev – búgingi qazaq beıneleý ónerinde óz mánerin qalyptastyrǵan jas sýretshi. Onyń týyndylary ózi aıtqandaı ishki álemi men jan tolǵanysynyń boıamasyz beınesi. Almas shyǵarmalaryn tamashalaǵanda eń aldymen kózge túsetini – kúrdeli qozǵalys pen rakýrsqa qurylǵan ekspressııaǵa toly tylsym kompozısııalar. Týyndygerdiń kenebin kómkergen keıipkerler máńgilik qozǵalysta.
Á.Qasteev murajaıynyń qabyrǵasynan sýretshiniń «DEBUT» atty shyǵarmashylyq kórmesi ashyldy. Osyǵan deıin talaı baıqaýlarda top jaryp, talaı kórmeniń kórigin qyzdyryp júrse de Almas úshin keń aýqymda uıymdastyrylǵan tuńǵysh jeke kórmesiniń mańyzy zor. Kórmege sýretshiniń ustazdary men qalamdas-qanattastary kil júırik kartınalar dep baǵalaǵan úzdik shyǵarmalary usynylǵan. Qylqalam sheberi natýrany jalpylaý men monýmentalızasııalaýǵa jaqyn. Ol negizgi beıneni shynaıy jazý úshin ǵana emes, sonymen qatar onyń jasyryn ishki maǵynasyn kórsetýdi maqsat tutqan.
Almas shyǵarmalarynda kóshpeli halqymyzdyń turmys tirshiligi, salt-dástúri, ádet-ǵurpy keńinen kórinis tabady. Tuıaǵymen or qazyp, aýyzdyǵymen alysqan tulpar da, jaýyna jebedeı atylǵan has batyr da, samalmen jarysyp ińkárine jan sózin aıtýǵa asyqqan bozbala da, tirshiliktiń tynymsyz qozǵalystar men úzdiksiz kúresterden turatynyna úńildiredi, fılosofııalyq tereńdikke tartady. Eń bastysy, shyǵarmalarynyń rýhynan halqymyzǵa tán minez baıqalady.
– Almas óziniń keskindemelik týyndylarynda detalızasııadan sanaly túrde alshaqtap, kompozısııanyń monýmentaldyǵyna umtylady. Ol ózi men keneptegi beıneniń ara qashyqtyǵyn saqtaı otyryp jalpylyqqa qol jetkizedi. Iаǵnı, sýretshi syrtqy turmystyq sýretteýden góri fılosofııalyq oılaýǵa talpynady. Oǵan avtordyń «Áke qanaty», «Dıalog», «Aýyz bekitý», «Syrlasý», «Kelisim aldynda» kompozısııalary jaqsy mysal bola alady. Munda qylqalam sheberi basty beıneni aýqymdy etip kórsetse, jazyqtyq betindegi zattar men fıgýralar úshin kenep kólemi árqashan tarlyq etetindeı áser qaldyrady.
Al «Avtoportretinde» ár kezeńde de óz dáýiriniń qaharmany bolyp tabylatyn sýretshi beınesin kúrdeli qozǵalysta barynsha aıshyqty etip jazady. Mundaǵy sýretshiniń basty qarýlary – qylqalam men palıtra. Sonymen qatar «Oıaný», «Qyzyl kitap», «Jańa áýen», «Sýretshiniń joly», «Sharyqtaý» kenepteri turmystyń shıelenisin, shyǵarmashylyqtyń tynysyn, sezim men oıdyń dramalyq dıalogyn kórsetedi. Nurǵojaev shyǵarmashylyǵynda zamanaýı qazaq beıneleý ónerindegi jańa izdenister men talpynystar kórinis tabýda, – deıdi kórme jetekshisi ónertanýshy Samal Mamytova.
Sýretshiniń qalamyna ilikken taqyryptardyń jelisi keń. Áke men bala, mahabbat, qoǵamdaǵy ótkir máseleler, sondaı-aq eń bastysy adam jáne onyń ómirmen nemese ózimen kúresi. Bul beınelerdiń árqaısysy ǵalamdyq tebirenispen kómkerilgen. Olar ótkir jaǵystar men monohromdy túster úılesiminde kúrdeli rakýrsta sheshilip, dene-bitimderine erekshe mán berile beıne bir músinshi sekildi saz balshyqpen emes, tús arqyly somdalady. Jumaqyn Qaırambaev, О́mirbek Jubanııazov sekildi ustazdardyń sheberhanasynda shyńdalǵan Almas Nurǵojaev ta búgingi tańda O. Tańsyqbaev atyndaǵy Almaty sándik-qoldanbaly óner kolledjinde shákirt baýlyp júr.
ALMATY