Memleket basshysy Qasym-Jomart Toqaevtyń tapsyrmasymen bólingen 5 myń áleýmettik bilim grantyn jergilikti atqarýshy organdar konkýrstyq negizde úlestiredi. Bul úshin oblys, respýblıkalyq mańyzy bar qalalar men astana ákimderimen konkýrstyq komıssııalar qurylatyn bolady, dep habarlaıdy QazAqparat.
QR Bilim jáne ǵylym mınıstrliginen málim etkendeı, granttarǵa kópbalaly nemese ataýly áleýmettik kómek kórsetiletin otbasylardan shyqqan balalar úmitker bola alady.
5 myń bilim granty óńirlerge ártúrli bólingen. Atap aıtqanda, Nur-Sultan qalasyna - 165, Almaty qalasyna – 190, Shymkent qalasyna – 390, Almaty oblysyna – 540, Aqmola oblysyna – 390, Aqtóbe oblysyna – 180, Atyraý oblysyna – 220, ShQO-ǵa – 180, Jambyl oblysyna – 460, BQO-ǵa – 100, Qaraǵandy oblysyna – 195, Qostanaı oblysyna – 85, Qyzylorda oblysyna – 390, Mańǵystaý oblysyna – 305, Pavlodar oblysyna – 75, SQO-ǵa – 60 jáne Túrkistan oblysyna 1345 grant bólinip otyr.
Konkýrsqa qatysý úshin 2019 jylǵy maýsym aıynda ótkizilgen UBT-da shekti ball jınaý mańyzdy bolyp tabylady.
«Ulttyq joǵary oqý oryndaryna túsý úshin ulttyq biryńǵaı testileý nátıjesi boıynsha – keminde 65 ball, basqa joǵary oqý oryndaryna – keminde 50 ball, «pedagogıkalyq ǵylym» baǵyty boıynsha – keminde 60 ball jınaý kerek.
Konkýrsqa qujattar 5 men 10 tamyz aralyǵynda qabyldanady.
Bilim granttaryn taǵaıyndaý jáne joǵary oqý oryndaryna qabyldaý 25 tamyzǵa deıin júrgiziledi», - dedi QR BǴM-nan.
Grant ıegerleriniń tizimin ákimdik jergilikti buqaralyq aqparat quraldarynda jarııalaıtyn bolady.
Eske salaıyq, Memleket basshysy Qasym-Jomart Toqaevtyń tapsyrmasymen kópbalaly jáne az qamtylǵan otbasylardyń balalaryna5 myń bilim granty bólindi.
«Ázirshe 5 myń, odan keıin bul júıe jumys isteıtin bolsa, kóre jatarmyz», - dedi Q.Toqaev. Prezıdent bul jumystyń mańyzdy elementi áleýmettik az qamtylǵan halyqtyń ishinen talantty balalar men jasóspirimderdi oqytý jáne joǵary oqý oryndaryna túsýge daıyndaý júıesi bolatyndyǵyn basa aıtty.