Oral qalasyndaǵy temir jol vokzalynda ınteraktıvti erekshe 3D-karta iske qosyldy. Elimizdegi «Rýhanı jańǵyrý» baǵdarlamasy aıasynda júzege asyrylǵan bul joba Batys Qazaqstan oblysy ákimdigi men «TorusMaps.kz» kompanııasynyń ortaq ónimi.
«TorusMaps.kz» kompanııasynyń tehnıkalyq dırektory Dáýren Ǵabdýllaevtyń aıtýynsha, bul osyndaı áleýmettik formatta júzege asyrylǵan elimizdegi tuńǵysh joba eken. Ázirge osyndaı eki karta ázirlengen. Onyń ekinshisi kópshilik jınalatyn Halyqqa qyzmet kórsetý ortalyǵynda nemese Sıtı-senter oıyn-saýyq saýda kesheninde qoıylýy múmkin.
«TorusMaps.kz» kompanııasynyń ınteraktıvti 3D-kartasy – Batys Qazaqstan oblysy kartasyndaǵy tarıhı oryndar men týrıstik nysandar týraly tolyqqandy aqparat – tarıhı málimetter, sýretter, beınebaıandar berip, vırtýaldy týrlar kórsetetin ámbebap sensorlyq termınal. Joba avtorlary karta baǵdarlamasy Samsýng kompanııasy qurastyrǵan kúlteli tehnologııa boıynsha jasalǵanyn aıtady. 3D-kartany paıdalanýshy bul jerden aýdıo, beıne, grafıkalyq, mýltımedıalyq jáne vırtýaldy aqparat ala alady.
Karta-termınaldyń quny 1 mıllıon 800 myń teńge eken. Uıymdastyrýshylar karta baǵdarlamasy únemi tolyqtyrylyp otyrylatynyn aıtady. Karta turǵyndar men qala qonaqtaryna Aq Jaıyq óńiriniń týrıstik áleýetin tanystyryp, kıeli jerlerdi nasıhattaıdy. О́z kezeginde bul ólketaný salasyn damytyp, jasóspirimderdiń boıynda patrıottyq sezimdi de kúsheıtedi.
– 2018 jyly óńirdiń kıeli jerleri boıynsha týrıstik baǵyt jasaqtaldy. Oǵan oblys aýmaǵyndaǵy 7 nysan engizildi. Batys Qazaqstan oblysynda qazirdiń ózinde jalpyulttyq jáne óńirlik deńgeıdegi 100-ge jýyq kıeli nysan anyqtalǵan. Sondyqtan biz kartamyzdy odan ári tolyqtyra beremiz, - deıdi Batys Qazaqstan oblystyq kásipkerlik jáne ındýstrıaldy-ınnovasııalyq damytý basqarmasynyń bas mamany Ásel Ájmuhanbetova.
Málimetterge qaraǵanda, kúni búgin týrısterdiń óńirge kelýi 18 paıyzǵa artqan. Sondyqtan týrısterdi qazaq, orys jáne aǵylshyn tilderinde naqty aqparatpen qamtamasyz etý maqsatynda atalmysh elektrondy paneldiń mańyzy zor. 3D-kartada oblystyń kıeli jerleri men týrısterge qajetti aqparat, máselen, meıramhanalar men qonaqúıler týraly málimet tolyq qamtylǵan.
Batys Qazaqstan