Tamyz aıynda qazaqstandyq sportshylar tórt birdeı álem chempıonatynda baq synaıdy. 10 tamyz kúni Japonııanyń Hatıodzı qalasynda sporttyq quzǵa órmeleýden lısenzııalyq álem birinshiligi bastaldy. Al 21-25 tamyz aralyǵynda Vengrııanyń Seged qalasynda baıdarka men kanoede esýden álemdik syn jeńimpazdary anyqtalady. 24 tamyzda Avstrııanyń Lıns qalasynda akademııalyq esýden, 25 tamyzda bolashaq Olımpıada astanasy Tokıoda dzıýdodan álem chempıonatynyń shymyldyǵy túriledi. Atalǵan álemdik dodalarǵa Qazaqstan komandasynyń daıyndyǵy qandaı? Joldama men medal alý máselesi qalaı sheshilmek? Olympic.kz komanda bapkerleriniń pikirin nazarlaryńyzǵa usynady.
Sporttyq quzǵa órmeleý
Hatıodzı qalasynda ótetin sporttyq quzǵa órmeleýden álem chempıonatynda tuńǵysh ret Olımpıada oıyndarynyń joldamasy taratylady. Komanda bapkeri Sáýle Ysqaqovanyń aıtýynsha, Olımpıada lısenzııasy kópsaıys boıynsha sarapqa salynady. Sondyqtan, kópsaıysshylarǵa basymdyq berilip otyr.
«Álem chempıonatyna bes sportshymyz joldama aldy. Olar: Azııa oıyndarynda besinshi oryn alǵan Ásel Marlenova, Azıadanyń tórtinshi oryn ıegeri Rıshat Haıbýllın, qazirgi Qazaqstan chempıony Margarıta Agambaeva men tájirıbeli Tamara Oljabaeva jáne jyldamdyqqa jarysýdan el úzdigi sanalatyn Ámir Maımuratov. 2024 jyly «jyldamdyq» boıynsha Olımpıadada júlde taratyla bastaıdy. Sol sebepti, Ámirdi osy bastan shyńdaýdy jón kórdik», - deıdi Sáýle Ysqaqova.
Bas bapker sportshylardyń aldyndaǵy basty mindet – TOP-20 qataryna ený ekenin aıtady.
«Fransııanyń Týlýza qalasynda ótetin qosymsha lısenzııalyq týrnırge qatysý úshin kópsaıysshylar alǵashqy 20 sportshynyń qataryna ený kerek. Sondaı-aq, Azııa chempıonatynda Olımpıada joldamasyn jeńip alatyn múmkindik bar. Álem chempıonatynda alǵashqy jıyrma sportshynyń qataryna qosylyp, tájirıbe jınaqtap, Azııa qurlyǵyndaǵy sportshylardyń áleýetin baıqaýdy basty mindet qyldyq. О́ıtkeni, Azııa chempıonatyndaǵy basty qarsylastyrymyzdy zertteý kerek», - deıdi ol.
Baıdarka men kanoede esý
Búginde baıdarka men kanoede esýden Qazaqstan komandasy Chehııada oqý-jattyǵý jıynyn ótkizýde. Qurama bas bapkeri Andreı Shantarovıch álem chempıonatyna qatysatyn sportshylar tizimin áli jarııalaǵan joq. Vengrııadaǵy álemdik synda tórt adamdyq baıdarkadan Olımpıada joldamasy sarapqa salynady. Bul báseke boıynsha qosymsha lısenzııalyq týrnırler ótpeıdi. Sondyqtan, tórt adamdyq baıdarkashylar moınynda úlken mindet tur.
«Álem chempıonatyna qatysatyn quramdy 90 paıyz anyqtap qoıdyq. Al tórt adamdyq baıdarkadan búginde alty adamdy baqylaýda ustap otyrmyz. Áli bir aptadaı ýaqyt bar. Jigitterdiń barlyǵy qarqyndy jattyǵý ústinde. Ázirge, álem chempıonatynda kimderdiń synǵa túsetinin aıtqan joqpyz. Degenmen, tórt adamdyq baıdarkada baq synaıtyn sportshylar bapkerler qaýymyna belgili. Naqty eshteńe aıtpadyq, áli ózgerister bolýy múmkin. Al tórt adamdyq baıdarkadan Olımpıada joldamasy tek qana álem chempıonatynda sarapqa salynady. Demek, Vengrııada lısenzııa utyp alý úshin bar kúshimizdi salý qajet. Jigitter qatelesýge bolmaıtynyn jaqsy biledi. Árbir metr úshin, árbir sekýnda úshin janymyzdy salamyz. Al álem chempıonatynan keıin jattyǵý jumystaryna ózgeris engizip, Azııa birinshiliginde eki jáne bir adamdyq baıdarkadaǵy sportshylardy synnan ótkizemiz. Jalpy, álem chempıonatyna 13 sportshy attanady. Onyń jeteýi baıdarkadan erler arasynda, ekeýi áıelder arasynda baq synaıdy. Kanoeden erler arasynda tórt sportshyǵa úmit artamyz» - dedi komanda bas bapkeri Andreı Shantarovıch.
Akademııalyq esý
Sporttyń bul túrinen komandaǵa jańa bapker taǵaıyndaldy. Vladımır Belonogov akademııalyq esýden ulttyq qurama tizginin bıylǵy qańtar aıynda ustaǵan bolatyn. Jańa bapker komandany jańa ádispen jattyqtyrýǵa kóshti. Búginde akademııalyq esýden Qazaqstan komandasy eýropalyq ádispen jattyǵýǵa kóp kóńil bólýde. Dese de, bas bapker álem chempıonatynda joldama men júldege talasa almaıtynyn ashyq aıtty.
«Búginde sportshylar jańa jospar boıynsha daıyndalýda. Biraq álem chempıonatynda jaqsy nátıje kórsetýge azdap ýaqyt jetpeıdi. Aldymyzda eki iri jarys tur – álem jáne Azııa birinshiligi. Eki iri týrnırge de qatysamyz. Odan bólek, Lınste ótetin álem chempıonatynda Olımpıada joldamasy sarapqa salynady. Birden basyn ashyp alǵan jón, biz álem chempıonatynda joldamadan úmittenbeımiz. О́ıtkeni, birinshi fınalǵa shyǵý úshin komandanyń daıyndyǵy jetkiliksiz. Jańa baǵdarlama boıynsha jattyǵý júrgizgenimizge kóp bolǵan joq. Sondyqtan, álemdik synda júlde men joldamanyń aýyly alys ekeni aıtpasa da túsinikti. Eýropalyqtarǵa jetý ázirge múmkin emes. Olarmen salystyrǵanda biz áli damý ústindemiz. Dese de, álem chempıonatyna maqsatsyz bara jatqan joqpyz. Birinshiden, komandanyń qazirgi daıyndyǵyn baqylaımyz. Ekinshiden, álemdik syndaǵy Azııa qurlyǵy ókilderiniń aıaq alysyna nazar aýdaramyz. О́ıtkeni, biz kelesi jyly ótetin qurlyq dodasynda joldamaǵa talasamyz. Al sol synda bizge basty qarsylas atanatyn komandalardyń áleýetin osy bastan zerttegen jón», - deıdi Vladımır Belonogov.
Akademııalyq esýden álem chempıonatynda baq synaıtyn sportshylar:
Vladıslav Iаkovlev (2000 metr, jekeleı syn), Svetlana Germanovıch (2000 metr, jekeleı syn), Mıhaıl Taskın, Anastas Shashkov (2000 metr, juptyq syn), Evgenıı Taseı, Danııl Savchenko (2000 metr, juptyq syn, jeńil salmaq), Marııa Chernes, Alına Klımenteva (2000 metr, juptyq syn, jeńil salmaq), Alına Mochýla (2000 metr, jekeleı syn, jeńil salmaq)
Dzıýdo
Dzıýdoshylar dodasy otandyq jankúıerler asyǵa kútken básekelerdiń biri. Sebebi, sporttyń bul túrinen júldege úmitti balýandarymyz joq emes.
«Qazaqstan quramasy Býrabaıdaǵy «Jaqsy» sport bazasynda daıyndyq ótkizýde. Bul álem chempıonaty qarsańyndaǵy negizgi daıyndyq kezeńderiniń biri. 16 tamyzda Almatyǵa oralyp, Novoalekseevkada toǵyz kúndik jıyn ótkizemiz. Sodan soń álem chempıonatyna attanamyz», - deıdi bas bapker Aıdyn Smaǵulov.
Dzıýdonyń túp atasy sanalatyn japon jerinde álem chempıony (2015), Olımpıada oıyndarynyń (2016) kúmis júldegeri Eldos Smetov, álem chempıonatynyń kúmis júldegeri (2018) Erlan Serikjanov, Azııa oıyndarynyń chempıony (2018) Dıdar Hamzalar ıýaq synaıdy.
2019 jyly Tokıoda ótetin dzıýdodan álem chempıonatyna qatysatyn Qazaqstan komandasy:
60 keli:
Eldos Smetov, Ǵusman Qyrǵyzbaev
66 keli: Erlan Serikjanov, Eldos Jumaqanov
73 keli: Jansaı Smaǵulov
81 keli: Dıdar Hamza, Rýslan Musaev
90 keli: Islam Bozbaev
100 keli: Aıbek Serikbaev Aralas komandalyq syn:
73 keli: Serik Aqylbek
90 keli: Islam Bozbaev
+100 keli: Erasyl Qajybaev