Almaty qalasynda taıaýda ashylǵan «Baqytty otbasy» ortalyǵynyń qyzmetine endigi kezekte kóp balaly analar ǵana emes aǵymdaǵy jyldyń shilde aıynan bastap jalǵyz basty analar men ákeler de áleýmettik máseleleri boıynsha júgine alady. Ortalyq menedjeri Jumagúl Tájibaevanyń aıtýynsha, qazirgi kezde qalanyń barlyq aýdandarynda jumysy jandana bastaǵan ortalyqtyń maqsaty salaýatty ortany qalyptastyra otyryp, qoǵam nazarynan tys qalǵan, kómekke zárý jandarǵa barynsha kómek qolyn usyný. Ortalyq jekelegen azamattardyń qala tirkemesiniń bolý-bolmaýyna qaramastan tıisti keńester, qajetti mamandyqtan ıgerýge, jeke kásibin ashýǵa múmkindik beredi. Ortalyqqa kelgender arnaıy saýalnama toltyryp, áleýmettik qyzmetkerden, psıhologtyń, zańgerdiń keńesine júgine alady.
Jýyrda qala ákimi Baqytjan Saǵyntaev ortalyqta kópbalaly analarmen kezdesip, olardyń kókeıtesti máselelerin tyńdaǵan bolatyn. Onyń barysynda bıznes bastaǵysy keletin áıelderge barynsha qoldaý kórsetý maqsatynda, «Isker ana» baǵdarlamasyn bir aı ishinde iske qosý boıynsha tapsyrma berilgen-di. Qazirgi kezde áıelder kásipkerligin damytý baǵytynda «Isker ana» jobasynyń tujyrymdamasy jasalyp, júzege asa bastady. Kez kelgen kásip bastaǵysy keletin azamat naqty sala boıynsha bilimin jetildirgennen keıin «Baqytt otbasy» mamandyrynyń kómegimen bıznes josparyn daıyndap, «Atameken» UKP bilimin jetildirýge barady. Arnaıy komıssııa saraptamasynan ótkennen keıin shaǵyn kásibin ashý úshin 505 myń teńge kóleminde memlekettik grantqa ıe bolady. Ortalyq mamandary qazirgi kezde tórt myńnan astam analardy qabyldap, ártúrli máseleler sheshimin tapqan. Ortalyq mamandary áleýmettik járdemaqy alý úshin qandaı qujattar rásimdedeýi qajettigi, baspana kezegine turý, biliktiligin arttyrý sııaqty kóptegen kókeıkesti máseleleri boıynsha analarǵa qoldaý kórsetýde.
Arnaıy mamandardyń keńesin alǵan analardyń basym kópshiliginde jaǵdaı kúrdeli. Tipten, óz densaýlyǵynyń, balalarynyń jaǵdaıynyń kúrdeliligin moıyndaǵysy kelmeıtin analarmen psıhologtar jáne dárigerlerdiń uzaq jumys isteýine týra keledi. Ortalyqtaǵy dárigerler kabıneti anasyna da, balasyna da alǵashqy medısınalyq kómek kórsetip, qajet bolsa, tıisti mamandar shaqyryp keńes berýmen qatar, turaqty baqylaýǵa alyp, ary qaraıǵy saýyǵyp ketýine de yqpal etýdi jolǵa qoıǵan. QR Densaýlyq saqtaý salasynyna eńbegi sińgen balalar pedıatry Toty Kabdrahmanqyzynyń aıtýynsha, qoǵam nazarynan tys qalǵan jandarmen sóılesý, olarǵa densaýlyǵyndaǵy kiltıpandarǵa qatysty eskertý jasap, endigi kezekte qandaı kómek alatyndyǵyn túsindirýdiń ózi qıyn. Al balalar pedıatry Aına Ábdirahmanqyzynyń aıtýynsha, dáriger úshin ondaı azamattarmen sóılesý asa shydamdylyqty talap etedi. Olardyń kóńilin taýyp, emdelýge, jaǵdaıyn durystaýǵa keńes berýdiń ózindik qıyndyǵy bar.
Ortalyq menedjeri Jumagúl Qýatbekqyzy ortalyqtaǵy jumys barysymen tanystyryp, «Shyraq», «Ýyq» kabınetterimen qatar zańger, psıholog keńesi mamandarynyń jumysynan da habardar etip ótti. Qazirgi sátte ortalyqta analar qosymsha mamandyqtardy ıgerip, Almatydaǵy fızıka-matematıka baǵytyndaǵy Nazarbaev ıntellektýaldy mektebiniń qoldaýymen aǵylshyn tili de oqytylýda. Al kompıýterlik ortalyqta arnaıy kýrstar júrgizilse, balalarymen kelgen analar úshin arnaıy bólmeler qarastyrylǵan. Onda kýrs ýaqyty bitkenshe tárbıeshiler balalardy sýret salyp, jelimmen túrli pishimder jasaýǵa baýlıdy.
Qazirgi kezde jekelegen aýdandardaǵy ortalyqtar jumystaryn jetildirýge baılanysty tıisti mamandar osy ortalyqtan tájirıbeden ótýde.