О́tken jyly qala irgesinde turatyn tanysymyzdyń úıin tonaǵan baýkespeler naq sol kúni, dáp sol kóshede turatyn taǵy bir úıdiń dúnıe-múlkin qoldy etken. Aryzdanýshylar muny urylardyń bir úıden alǵan qymbat tymaqty kelesi bir úıge tastap ketkeninen bilgen. Ańǵarǵanymyzdaı, bógdeniń qasyqtap jınaǵan nesibesine qol suǵyp, ońaı oljaǵa kenelemiz degen qylmyskerler tapaıdyń tal túsinde bireýdiń páterine bas suǵyp kirýge esh qymsynbaıtyn bolǵan.
Almaty qalalyq Polısııa departamentiniń aqparatyna sáıkes, shahardaǵy turǵyn úı aýlalary men qoǵamdyq nysandar aýmaǵyna ornatylǵan beınekameralardyń arqasynda bótenniń múlkin urlaý qylmysy edáýir azaıyp otyr. Statıstıkalyq derekter boıynsha páter tonaý – 2,3 esege, avtomobıl urlyǵy – 2,9%, uıaly telefon urlyǵy – 48,1%, kólik aınalaryn urlaý – 4,3% -ǵa, qalta urlyǵy – 3,4 esege, kólik ishinen zat urlaý – 13,5%, tústi jáne qara metaldy urlaý 21,7%- ǵa azaıypty.
Mamandar qylmystyń aldyn alý maqsatynda IT tehnologııalardyń múmkindigin belsendi paıdalanýda. Búginde qalada 120 myńǵa jýyq beınebaqylaý kamerasy bar desek, olardyń 90%-y bıýdjetten tys qarjyǵa ornatylǵan. Beınetaspaǵa jazylǵan materıaldardy qoldaný nátıjesinde sońǵy úsh jylda páter urlyǵy 2,9 ese tómendepti.
Qorasyz qoı baǵyp, otaýyna qulyp salmaǵan jurt búginde jeke múlkiniń qaýipsizdik máselesine alańdamaı tura almaıdy. Qala aýmaǵyndaǵy páter urlyǵynyń azaıýyna turǵyndardyń óz dúnıe-múlkine yqtııatpen qarap, túrli aqyldy kameralar ornatýy men kúzet mekemeleriniń qyzmetine júginýi sep bolyp otyr.
ALMATY