Búgin Almaty ákimdiginiń baspasóz ortalyǵynda Almaty qalasy Qoǵamdyq keńesiniń tóraǵasy Rahman Alshanov pen JPQ bastyǵy Tórehan Isınniń qatysýymen Almaty qalasynyń joldarynda qaýipsizdikti qamtamasyz etý jáne ólimdi azaıtýdyń qosymsha sharalary týraly brıfıng ótti.
Polısııa departamentiniń málimeti boıynsha sońǵy jeti aıda Almaty qalasynyń aýmaǵynda jol-kólik oqıǵalarynda qaza bolǵandardyń sany 73-ten 83 adamǵa deıin (ósim 13,7%) kóbeıgen. Qala aýmaǵyndaǵy apattyq ýchaskelerdiń biri – Alataý aýdanynyń aýmaǵy bolyp tabylady. Atap aıtqanda, Saın (4), Momyshuly (5), Soltústik aınalym (3), Janqoja batyr (2) kósheleri.
Taldaý nátıjeleri kórsetkendeı, joldardaǵy ólim-jitimniń negizgi sebepteri kóshelerdiń jaryqtandyrylmaýy, baǵdarshamdar men jaıaý júrginshiler ótpeliniń az bolýy, kólik jyldamdyǵyn tómendetý úshin jasandy kedir-budyr elementteriniń kóptigi jáne qozǵalys qaýipsizdigin baqylaıtyn beınekameralardyń jetkiliksiz bolýy eken.
Osyǵan baılanysty qala ákimdigi polısııa departamentimen birlese otyryp birqatar sharalardy qabyldaıdy.
Jyl sońyna deıin 208 kóshege jaryq ornatý josparlanýda. 70 jaıaý júrginshiler ótpeline de jaryq qoıylady. Sondaı-aq PD-men birlesip krımınogendik jáne apatty ýchaskelerdi jaryqtandyrý máselesi jolǵa qoıyldy. 2020 jyldyń sońyna deıin qalanyń barlyq aýlalary men kóshelerine jaryq ornatý josparlanyp otyr.
Qala boıynsha «Sergek» beınekameralary ornatylady. Qosymsha 707 beket paıda bolady. Jol-kólik oqıǵalaryna asa beıim 72 ýchaske qaıta qurylatyn bolady. Burylý radıýsy qysqartylyp, trotýarlar sany men pandýstardy kóbeıedi. Sondaı-aq statıstıka boıynsha jol-kólik oqıǵasyn 46%-ǵa tómendetýge múmkindik beretin qaýipsizdik araldary paıda bolady. Qyrkúıek aıynda 50 ýchaskede qaýipsizdik araldary paıda bolady.
Rettelmeıtin qıylystarda qosymsha 7 baǵdarsham nysandaryn ornatý qolǵa alynady. 12-ge jýyq rettelmeıtin jaıaý júrginshiler ótkeline LED-jaryqtandyrýdy qoıý jumystary aıaqtalýǵa jaqyn. Sondaı-aq rettelmeıtin 3 jaıaý júrginshiler ótkeline SI-5 tirekterindegi belgilermen jabdyqtaý boıynsha jumystar aıaqtalýda.
Kólik quraldarynyń jyldamdyǵyn májbúrlep tómendetý úshin jasandy kedir-budyrlyqtyń sany artady.
Mektep mańyndaǵy jáne adamdar kóp jınalatyn jerlerde rettelmeıtin jaıaý júrginshiler ótkelderin ornatý boıynsha jumystar júrgizilýde. Sonymen qatar qala ákimdigine qala turǵyndary men avtoáýesqoılar tarapynan joǵary jyldamdyqty magıstraldarda (ShAAJ, Ál-Farabı dańǵyly) saǵatyna 80 shaqyrymǵa deıin ruqsat etilgen jyldamdyqty qaıtarýdy suraýda. Osyǵan baılanysty qala ákimshiligi sońǵy bir jarym aıdyń ishinde qoǵamdyq qysymdy sezip keledi.
Ál-Farabı dańǵyly, ShAAJ qalanyń negizgi tranzıttik magıstraldary bolyp tabylady. Shet elderdiń tájirıbesi kórsetkendeı, jyldamdyqty shekteý kóbinese ortalyq kóshelerge qoldanylady. Mysaly, Ispanııanyń aınalmaly joldarynda ruqsat etilgen eń joǵary jyldamdyq 120 km/saǵ, Máskeýdiń MKAD-ynda – 100 km/saǵ. Ákim men ákimdiktiń, Open Almaty-ǵa kelip túsken ótinishterdiń basym bóligi atalǵan kóshelerde jyldamdyq rejımin 80 saǵ/shaqyrym jyldamdyqty qaıtarýdy kórsetti. Búgingi kúnge 800-den astam ótinish kelip tústi. Almaty qalasynyń Qoǵamdyq keńesi, qala ákimdigi jurtshylyqtyń qalaýy boıynsha ruqsat etilgen 80 km/saǵ jyldamdyqty ortaq aınalma jol mindetin atqaryp otyrǵan Ál-Farabı dańǵyly men ShAAJ-da qaıta engizbek.