Qazaqstandyq «Astana» komandasynyń veloshabandozy Alekseı Lýsenko tórt kúnge sozylǵan «Norvegııanyń arktıkalyq jarysynda» jeńiske jetti.
Norvegııa tasjolynda ótken básekeniń sońǵy jarys kúninde sportshylar Ledıngen men Narvık qalalaryn jalǵaǵan 165,5 shaqyrym qashyqtyqty júrip ótti. Máre syzyǵyn birinshi bolyp norvegııalyq Markýs Helgaard kesse, ekinshi oryndy otandasy Amýnd Grıondal Iаnsen ıelendi. Úzdik úshtikti Qazaqstan chempıony Alekseı Lýsenko túıindedi.
Osylaısha, Lýsenko tórt kúnge sozylǵan jarystyń jalpy kezeńi boıynsha top jardy. Ekinshi orynda Team Arkea Samsic ókili, fransýz Varran Bargıı. Israel Cycling Academy velosportshysy Krısts Neılands úzdik úshtikti qorytyndylady. «Astananyń» taǵy bir ókili Ýgo Ýl 5-shi orynǵa taban tiredi. Sondaı-aq «Astana» velokomandasy jalpykomandalyq esepte birinshi boldy.