Jas kásipker Evgenııa Shelýdko byltyr naýryz aıynda jeke kásibin ashty. О́z qabiletine kúmándanǵan keıbir jas kásipkerlerge qaraǵanda, bizdiń keıipkerimiz bıznes álemine batyl qadam basty. Evgenııa bódene ósirýmen aınalysady. Onyń komandasy Ekibastuz jáne Pavlodar qalalaryna bódene eti men jumyrtqasyn jetkizedi.
– Barlyǵy «StartUp Bolashaq» konkýrsynan bastaldy. Osy konkýrstan keıin «Bastaý Bıznes» baǵdarlamasyna qatystym. Baıqaýdaǵy tálimgerlerdiń biri meni oqýǵa shaqyrǵan soń qolymda sertıfıkat bolǵandyqtan, grantqa ótinish bildirdim. Jobany sátti qorǵap shyqtym da grant qarajatyn paıdalanyp qajetti jabdyq satyp aldym, – dedi bıznesvýmen.
«Bastaý Bıznes» baǵdarlamasynyń artyqshylyqtaryn qospaǵanda, ónimderin saqtaıtyn tońazytqyshtar satyp alýynyń ózi Evgenııanyń kásibine aıtarlyqtaı oń áser etti.
– Búginde «Atameken» Ulttyq kásipkerler palatasy men «Damý» kásipkerlikti damytý qory meni túrli kórmelerge jıi shaqyratyn boldy. Bul, árıne jańa tanystyqtar arqyly jańa klıentterdiń kelýine múmkindik beredi jáne jalpy bıznestiń damýyna oń áser etedi, – dep keıipkerimiz sózin sabaqtady.
Evgenııanyń negizgi mamandyǵy – feldsher. Degenmen, mamandyǵy ózine múldem basqa joldy tańdaýyna kedergi bolǵan joq. Oǵan qosa, kásipker óziniń jeke isin órkendetý úshin bilimin jetildiretin «altyn kenish» tapqandaı boldy.
– Jaqynda men «Áıelder mıkrobıznesi» jobasyna qatystym. Qazirgi ýaqytta «Atameken» UKP-nyń «Iskerlik baılanystar» jobasynyń qatysýshysymyn. Aıtaıyn degenim, búginde kóptegen jobalar bar, biraq ondaǵy aqparattar jıi qaıtalanady. Al men úshin «Bastaý Bıznes» rasymen de bıznesimniń bastaýy boldy, bul meniń kásipker retinde eseıýýim dep bilemin, – dedi Evgenııa Shelýdko.
«Bastaý Bıznes» kásipkerlik negizderin oqytý jobasy nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasy aıasynda iske qosyldy. Jyl basynan beri oqýǵa qabyldanǵan 15 myń azamattyń 3,5 myńnan astamy óz isin ashýǵa jáne ilgeriletýge granttar men mıkrokredıtter aldy. Osylaısha jańa jumys oryndaryn qurýǵa yqpal etetin kásipkerlik sýbektilerdi múmkindiginshe kóp qamtý josparlanýda.
– Bizge bıznes-jospar, qarjy jospary ne ekenin jáne ony qalaı jasaıtynyn egjeı-tegjeıli túsindirdi. Bızneske jańadan qadam basqan bizge bul óte mańyzdy boldy. Meniń kásipkerliktegi alǵashqy mektebim desem de bolady. Búginde basqa jobalarǵa qatysqanda bárin bilip otyramyn. Aıtpaqshy, bizdiń mekeme «Bizdiń ónim» dep atalady, ónimderimizdi alǵysy kelgender bolsa ınternetten taýyp ala alady, – dep Evgenııa sózin qorytyndylady.
Bıyl baǵdarlamaǵa kóp balaly otbasylar men jastardy qoldaýǵa baǵyttalǵan ózgerister engizildi.
Máselen, 2019-2021 jyldary jastardyń jańa bıznes-ıdeıalaryn iske asyrý úshin az qamtylǵan kóp balaly otbasylarǵa, az qamtylǵan múgedektigi bar eńbekke jaramdy adamdarǵa 505 myń teńgege deıingi mólsherde 30 myń tegin grant beriledi.
Budan basqa, jyl saıyn jastarǵa, kóp balaly analarǵa, múgedektigi bar adamdarǵa jeke kásibin ashý úshin 6,5 mln teńgege deıingi mólsherde jáne zákirlik kooperasııany damytý úshin 20 mln teńgege deıingi mólsherde 5 myń mıkrokredıt beriletin bolady.