Nur-Sultan qalalyq Memlekettik akademııalyq fılarmonııasy janyndaǵy Qazaq orkestriniń HHIII konserttik maýsymy batyr babamyz Mahambet О́temisulynyń 215 jyldyǵyna arnalǵan «Qaıran, Naryn» kúı-keshimen ashylmaq.
Elbasynyń «Rýhanı jańǵyrý» baǵdarlamasy aıasynda ótetin is-sharada Mahambettiń «Qaıran, Naryn», «Shilterli tereze», «Jaıyq asý», «Joryqta», «Isataıdyń Aqtabany-aı», «Jumyr-Qylysh», «О́kinish», «Arysymnan aıryldym», «Men, men, edim, men edim» syndy, t.b. qadaý-qadaý kúı-muralary oryndalyp, sahnalyq kórinister tartý etilmek. Sondaı-aq baǵdarlamaǵa Qurmanǵazynyń «Kishkentaı», KSRO halyq ártisi Nurǵısa Tilendıevtiń «Mahambet», Qazaqstannyń eńbek sińirgen qaıratkeri, «Parasat» ordeniniń ıegeri Aıtqalı Jaıymovtyń «Ereýil atqa er salmaı», Nurlan Bekenovtiń «Qyzǵysh qus» sııaqty kóptegen kúı-sımfonııasy enip otyr.
Halqy ardaq tutqan asyl er Uly dalanyń azattyǵy jolynda, táýelsizdik tańy úshin kúresti desek, bahadúr batyrdyń otty jyrlary men júrekti qaq jaratyn týyndylarynyń mańyzy keıingi urpaǵy úshin áli de qundy, áli de baǵa jetpes baılyq sanalady. Mahambet – qazaqtyń qashanda asqaq rýhy, alasarmas armany, máńgilik úlgi tutar tulǵasy. Onyń erlik jolyn, kúreskerlik bolmysyn dáripteý, urpaqtan-urpaqqa nasıhattaý – keleshektiń ortaq paryzy, uly mıssııasy. Memlekettik akademııalyq fılarmonııasynyń kúı jobasyn «Rýhanı jańǵyrý» baǵdarlamasy aıasynda qolǵa alýdaǵy maqsaty da sol – tarıhı-mádenı murany saqtaý, damytý jáne keńinen dáripteý.
Qarshyǵa KÚLEN