Kenshiler astanasynda ótken «Mereıli otbasy» respýblıkalyq baıqaýynyń oblystyq kezeńine óńirdiń barlyq qalalary men aýdandarynan 19 otbasy qatysty. Qazylar alqasy úzdikterdi anyqtar kezde otbasynyń tarıhy men dástúrin, áýlettiń belgili bir mamandyqqa adal bolýyn jáne shańyraqtaǵy balalar sanyn erekshe nazarǵa aldy.
Baıqaýǵa Jezqazǵannan kelip qatysqan Qaırat Taǵambaev mundaı shara sharapatynyń mol bolǵanyn jasyrmady.
– Maǵan osy baıqaýǵa ákimdik qyzmetkerleri qatysýǵa usynys jasady, sebebi men kóp balaly ákesimin – bes balam bar. Men ózim de on balanyń birimin, meniń ata-anamnyń 25 nemeresi bar, olardyń tegi Salqaýovtar. Portfolıo jınaý osynsha qyzyqty bolady dep kútpegen edim. Ol úshin qujattardy daıyndaý tipti de qyzyqty boldy. Men olardy eki apta boıy jınap, otbasy týraly kóptegen qyzyqty málimetterge qanyq boldym. Keıbir derekterdi bilmeıdi ekenmin, al birazyn umytyp ta qalyppyn. Bul bir qyzyqty tájirıbe boldy. Bul iske barlyq týystarymyz jumyldy. Biz óz otbasymyzdyń tarıhyn balalarǵa aıtyp, ony bilý mańyzdy ekenine kóz jetkizdik, – deıdi ol.
Bıyl da oblystyq kezeńde otbasylardy irikteý ólshemsharttary aımaqtyq baıqaýdaǵydaı bolyp ózgerissiz qaldy. Esesine, básekelestik aıtarlyqtaı óse túsken.
Mysaly, Jezqazǵannan kelgen Stamqulovtar otbasynda 11 bala, 33 nemere, 17 shóbere bar. Otaǵasy Álırahman Stamqulov 20 jyl mektep dırektory bolyp jumys istegen eken, «Qazaq SSR halyq aǵartý isiniń úzdigi» belgisimen marapattalǵan. Ol kisiniń zaıyby Roza Sekemanovanyń aıtýynsha, otbasynyń barlyq músheleri jıi bas qosyp turady eken.
– Merekelerde mindetti túrde bas qosyp, et asamyz. Bul dástúr bolyp ketken, – deıdi otanasy.
Baıqaýda Qaraǵandy qalasynyń tanymal otbasylary da baq synady. Mysaly, «Daryndy bala» jekemenshik balabaqshalar jelisiniń jáne «Daryndy ana» kovorkıng-ortalyǵynyń negizin qalaýshy Aınagúl Hamıtovanyń otbasy qatysyp, konkýrstyń kórigin qyzdyrdy. Isker áıel bes balanyń anasy. Onyń atasy Tóleýhan Hamıtov Uly Otan soǵysynyń ardageri eken. Al anasy Sánııa Hamıtova uzaq jyldar aýdandyq emhanada dáriger bolyp jumys istegen.
Sonymen, «Mereıli otbasy» baıqaýynyń oblystyq kezeńinde bas júldege Hamıtovtar áýleti laıyq dep tanyldy. Jeńimpaz otbasyǵa «Jartas» shıpajaıyna 10 kúnge joldama berildi. Ekinshi júldeni Jezqazǵan qalasy atynan qatysqan Salqaýovtar otbasy otbasy ıelendi. Respýblıkalyq komıssııanyń sheshimimen endi olar elordada ótetin baıqaýdyń aqtyq saıysynda Qaraǵandy oblysynyń namysyn qorǵaıtyn bolady. Al, úshinshi oryn Stamqulovtar otbasyna buıyrdy.
– Oblystyq kezeńde otbasymyzdyń músheleri tolyq jınala almaı qaldy. Qaryndasym men kelinim jýyrda bosanyp, qatysa almady. Biraq respýblıkalyq kezeńge barlyǵy keledi degen úmittemin. Biz fınalǵa tolyq daıynbyz, – deıdi Salqaýovtar otbasynyń kóshbasshysy Qaırat Taǵambaev.
Baıqaýǵa qatysyp, baq synaǵan otbasylardyń barlyǵyna estelik syılyqtar tapsyryldy.
Qaraǵandy oblysy