Búgin Májilis depýtattary J.Dúısebaev, G.Qaraqusova jáne T.Iаkovleva Aqmola oblysynyń Aqkól qalasyndaǵy «Smart Aqkol» ahýaldyq ortalyǵyna bardy. Bul týraly Májilistiń baspasóz qyzmeti habarlady.
Azamattardyń turmys sapasyn arttyrýǵa, qolaıly ári qaýipsiz orta qalyptastyrýǵa baǵyttalyp, sıfrlandyrý salasynda júzege asyrylǵan «Smart city» jobasymen tanysqan depýtattar atalǵan ortalyqtyń bolashaǵy zor ekenine nazar aýdardy.
Jan-jaqty sońǵy tehnologııamen qamtamasyz etilgen ortalyq odan ári durys ári naqty jumys istese, turǵyndarǵa shynaıy kómegin tıgizbek.
Osy rette Májilis depýtaty J.Dúısebaev:
- Qalanyń eń negizgi degen suraqtaryn basqarý júıesi qurylǵan. Onyń ishinde densaýlyq saqtaý, oqý salasy, tártip salasy, jaryqpen qamtamasyz etý, ýaqytynda jedel-járdem kórsetý máseleleri jáne taǵy basqa jaǵdaılar, burynǵydaı emes, ýaqytynda sheshilip, halyq óziniń jaǵdaıyn jaqsartýǵa jol ashady, - dedi. Aıta ketý kerek, «Smart Aqkol» jobasy Prezıdent Nursultan Nazarbaevtyń tapsyrmasy boıynsha «Sıfrly Qazaqstan» memlekettik baǵdarlamasy aıasynda júzege asyrylǵan.
Onda barlyq derekter dıspetcherlik zaly, monıtorıngileýge arnalǵan beıneqabyrǵasy jáne beınekonferensbaılanys júıesi, call-ortalyǵy bar obektige – ahýaldyq ortalyqqa kelip túsedi.
Ahýaldyq ortalyq vedomstvoaralyq ózara is-qımyldy uıymdastyrý, qala ómirin taktıkalyq jáne strategııalyq basqarý, qala resýrstary týraly durys jáne óz ýaqytyndaǵy derekterdi agregattaý, qaýipsizdikti qamtamasyz etý boıynsha sheshimderdi kórsetý úshin qajetti ınfraqurylymmen jabdyqtalǵan. Derekterdi jınaý jáne óńdeý býnkerlik tıptegi «Qazaqtelekom» AQ derekterdi óńdeý ortalyǵynda júrgiziledi, al bul qaýipsizdik pen turaqty jumys isteýdiń joǵary deńgeıin qamtamasyz etý turǵysynan biregeı bolyp tabylady.