Elordada Memleket basshysy Qasym-Jomart Toqaevtyń qatysýymen Azııa elderi qalamgerleriniń tuńǵysh forýmy bastaldy. Bul týraly Qazaqparat tilshisi habarlady.
Azııa elderi qalamgerleriniń tuńǵysh forýmy Azııa qurlyǵynda ornalasqan elder arasyndaǵy ádebı-mádenı baılanystardy nyǵaıtý, odan ári damytý ári egemendi elimizdiń búgingi keskin-kelbetin, Qazaqstannyń ádebıetin, rýhanı qundylyqtaryn pash etý, ádebı úderistiń damýyna qatysty Azııa elderimen tájirıbe almasý syndy maqsat-mindetterdi kózdeıdi. Ádebı forýmnyń jalpy otyrysyna Nobel syılyǵynyń nomınanttary Ońtústik Koreıa qalamgeri Ko Yn, katarlyq Moza al-Malkı, mońǵolııalyq Gombojavyn Mend Ooıoo, Ońtústik Azııa halyqaralyq syılyǵynyń laýreaty úndistandyq Amar Mıtra, Ázerbaıjan halyq jazýshysy Anar Rasýyl Rzaev baıandama jasaıdy.
Forým jumysy 3 kúnge sozylady. Búgin sharanyń jalpy otyrysy ótip jatyr. Eki bólimde 11 spıker baıandama oqıdy. Erteń TED.9 formatynda arnaıy shara ótedi. Onda 10 spıker dáris oqyp, erkin formatta suhbattasady. Sondaı-aq, Abaı kóshesiniń boıynda «Qalamgerler alleıasy» ashylady. Shara aıasynda Ortalyq Azııa qalamgerleriniń kezdesýi ótedi. Onda Uly Jibek joly boıyndaǵy ádebıettiń bolashaǵy týraly aıtylady. Forým aıasynda jas Azııa qalamgerleriniń kezdesýi de josparlanǵan.
Prezıdent ákimshiligi men Mádenıet jáne sport mınıstrliginiń qoldaýyman ótetin shara 4-6 qyrkúıek kúnderine josparlanǵan. Forýmǵa sonymen qatar Býker jáne ASEAN syılyqtarynyń laýreattary, jazýshylar odaqtary men qaýymdastyqtarynyń tóraǵalarynan quralǵan 90 qonaq kelgen.