Arys qalasyn qalpyna keltirý jumystary tolyq aıaqtalýǵa jaqyn. Búginde 7149 – turǵyn jáne kópqabatty úılerde qurylys jumystary aıaqtalsa, qalǵan 15 nysanda qurylys jumystary jalǵasýda. Degenmen 10 nysan boıynsha menshik ıeleriniń kelispeýinen qurylys jumystary toqtap tur.
Bul jóninde Túrkistan oblysynyń ákimi О́mirzaq Shókeevtiń tóraǵalyǵymen ótken Arys qalasyn qalpyna keltirý jumystaryn júrgizý boıynsha apparattyq jıynda oblystyq qurylys basqarmasy basshysynyń orynbasary Erbol Ahmetov málim etti. Jalpy qalpyna keltirý jumystaryna 144 – qurylys kompanııalary, 4 248 – jumysshy, 215 – arnaıy tehnıka tartylǵan. Arys qalasy boıynsha avtomobıl joldaryn jóndeý jumystaryn júrgizý 13 aımaqta josparlanǵan. Búginde jalpy 62 kósheniń 37-si jóndelgen. Qalǵan 25 kóshede jumys júrgizilýde, 16 kóshege aıaqjol salynǵan. Qaladaǵy 543 kommersııalyq nysannyń 509-yna zalal keltirilgen, al 12 nysan tolyǵymen joıylǵan. Jóndeýdi qajet etken 68 áleýmettik nysannyń 62-sinde qurylys jumystary aıaqtaldy. Qalǵan 6 nysanda jumys jalǵasýda. Elimizdiń barlyq oblystarynan kelgen Arys qalasyndaǵy qurylys jumystaryna jaýapty ókilderi, Túrkistan oblystyq basqarma basshylary men aýdandyq ákimdik mamandary qatysqan jıynda О́.Shókeev qurylys nysandaryn belgilengen merzimde aıaqtaýdy, sapaǵa basa nazar aýdarýdy tapsyrdy.
Sondaı-aq jıynda sóz alǵan qurylysshylar jumysqa kedergi keltirip jatqan birqatar máselelerdi kóterdi. Mysaly, Arystaǵy birneshe úı ıeleri saraptaý qorytyndysymen kelispeı otyr. Turǵyndar úılerin kúrdeli jóndeýdiń ornyna túgel súrip tastaýdy talap etýde. Mundaı azamattarǵa aldyn ala eskertýler jasalǵan. Qujattardy zańdastyrýǵa qatysty keı qıynshylyqtar da belgilengen merzimnen keshigýge sep bolýda eken. Bul oraıda oblys ákimi barlyq máseleni jeke qarap, turǵyn úı ıeleriniń ótinishterin eskere otyryp sheshý qajettigin aıtty.