Astanalyqtar demalys kúnderin qyzyqty ári paıdaly ótkizý úshin qaıda barýǵa bolady? Demalys kúnderi qalada ótetin mádenı jáne sporttyq is-sharalarǵa sholý.
11 jáne 14 qyrkúıek kúnderi «Astana Opera» Memlekettik opera jáne balet teatry óz qonaqtaryn A.Adannyń «Jızel» baletin tamashalaýǵa shaqyrady. Álemdik týyndynyń premerasy 1841 jyly Parıjdiń Grand Operasynda ótken bolatyn. Sodan beri «Jızel» álemniń túrli balet teatrynda qoıylsa da, osy ýaqytqa deıin ózektiligi men ataǵyn joǵaltqan joq. Qoıylym 18.00-de «Astana Opera» teatrynyń Úlken zalynda ótedi. Bılet quny 500 teńgeden bastalady.
15 qyrkúıekte elordada «Phanerozoic I: Palaeozoic» týrynyń aıasynda ataqty «The Ocean» toby konsertin qoıady. Top Reseı, Belarýs, Armenııa, Grýzııa, Qazaqstan, Japonııa qalalaryna gastrolmen barady. Nur-Sultan qalasyndaǵy toptyń konserti 15 qyrkúıek kúni saǵat 20.00-de bastalady. О́tetin orny: Qorǵaljyn tas joly 3, The Bus. Konsert bıletteriniń quny 5000 teńgeden bastalady. Osy demalysta elordada birneshe sporttyq sharalar da ótedi.
13 qyrkúıekte hokkeı jankúıerleri «Nomad» jáne «Sokol» klýbtary arasyndaǵy matchty tamashalaı alady. Oıyn «Qazaqstan» sport saraıynda 19.00-de ótedi, bıletter quny 200 teńgeden bastalady.
14 qyrkúıekte «Barys Arena» alańynda grek-rım, erkin jáne áıelder kúresinen Álem chempıonatynyń ashylýy bolady. Oǵan álemniń 100-ge jýyq elinen 900 sportshy qatysady. Jarysqa shamamen 10 000 jankúıer keledi dep josparlanýda. Qazaqstan aýmaǵynda chempıonatty Kazsport telearnasy taratady. Al, tikeleı kórsetilimdi United World Wrestling (UWW) resmı saıtynan qaraı alasyz. Chempıonat 22 qyrkúıekke deıin jalǵasady, kórermenderge kirý quny 1000 teńgeden bastalady.
12 jáne 13 qyrkúıek kúnderi Nur-Sultan qalasynda Synergy Global Forum ótedi. Hedlaıner retinde jeke tulǵanyń ósýi taqyrybynda álemdik sarapshy bolyp esepteletin áıgili Nık Výıchıch pen Ishak Pıntosevıch óz oılarymen bólisedi. Nık Výıchıch «Shekarasyz ómir» taqyrybynda, al Ishak Pıntosevıch «Jalqaýlyq jeńimpazy. Shekarasyz ómir» taqyryptarynda sheberlik-klasstaryn ótkizedi. Trenıng saǵat 19.00-de «Saryarqa» velotreginde bastalady. Kirý quny 11 200 teńgeden 72 800 teńgege deıin.