Qart kisini qazyna dep esepteıtin halqymyzdyń izgi ustanymy, qurmeti urpaqtarǵa jalǵasyp keledi. Búgingi qazaq jastary – mekteptegi bala býyn baba sabaqtastyǵyn úzbeı qarttardy qurmetteıtindikterin jańa formatta kórsetti.
1 qazan – Qarttar kúnine oraı Aqtaý qalasyndaǵy hımııa-bıologııa baǵytyndaǵy Nazarbaev zııatkerlik mektebiniń oqýshylary «Úlkenge bizde izet bar» atty qurmet kúnin ótkizdi. Bilim ordasynyń oqýshylary ata-ájelerin mektepke shaqyryp, olardyń ómir týraly tereń oılaryn tyńdady.
«Dara jol» baǵdarlamasy formatynda uıymdastyrylǵan júzdesýde nemerelerine erip mektepke kelgen qarttar – Orazǵalı О́teýlıev, Kúreńtaı Izbergenov, Saılaý Qalıev pen Jumanur Balhaev bozbalalyq shaqtary, armandary, eńbek joldary, ómir jáne otbasylyq qundylyqtary týraly aıtyp, jınalǵan oqýshylardy áńgimege uıytty. О́z kezeginde zııatkerler atalaryna arnap, kórinis qoıyp, qazaqtyń kıeli dombyrasynan kúı kúmbirletti.
– Mektebimizge kelgen atalarymyz kópti kórgen, ónegelik joly bar, tereń oıly aqsaqaldar eken. Qazaqtyń qundylyqtaryn boılaryna sińirip, endi sol izgi qasıetti urpaq boıynan kórsek dep armandaıtyn qarııalar kóptegen tushymdy oılaryn aıtyp, oqýshylardy ǵana emes, ustazdardy da rýhanı baıytyp, úlken tárbıelik saǵatyn ótkizdi. Kesh sońynda balalar kezdesýden ketkisi kelmedi, – deıdi mektep dırektorynyń orynbasary Altynzer Ihsanova.
Sondaı-aq zııatkerler ordasynda qarııalarǵa izet kórsetý maqsatynda «Urpaqtar sabaqtastyǵy» fotokórmesi uıymdastyryldy. Oqý ǵımaratynyń bas dálizinde balalardyń ata-ájelerimen túsken sýretteri qaz-qatar ilinip, ystyq lebiz bildirý taqtaıshasy ornatyldy.
Qarttarǵa qurmet bul sharamen aıaqtalmaıdy deıdi oqý ornynyń ustazdary. Endi «Meıirim óskini» atty oqýshylardyń qaıyrymdylyq toby Mańǵystaý oblystyq qarttar úıiniń aqsaqaldaryna «Bookcrossing» jobasy aıasynda kitaptar men osy kúnge deıin birlese ótkizgen kezdesýlerden estelik albom syılamaq, sondaı-aq qarııalarmen Kaspıı jaǵasyna jáne qala ishine ekskýrsııa josparlanǵan.
Qarııa – kósh basyndaǵy adastyrmas baǵdar. Baba jolynan jańylmaımyn degen jas qarttarǵa qamqorlyq tanyta júrip, olardyń tálimi men ulaǵatyn boıyna sińire qalyptasatyny anyq. Aqtaýdaǵy mektepte ótken shaǵyn shara ári qyzyqty, ári tartymdy, eń basty qundylyǵy – qarttar men jastardyń pikirlesý alańyn qura alǵan jańashyldyǵynda.
Mańǵystaý oblysy