Elordada Beıbitshilik jáne kelisim saraıynda HHI qalalyq til festıvaliniń saltanatty merekelik keshi ótti. Bul týraly «Rýhanııat» kommýnaldyq memlekettik mekemesi habarlady.
Nur-Sultan qalasynyń ákimdiginiń Tilderdi damytý jáne arhıv isi basqarmasy, «Rýhanııat» kommýnaldyq memlekettik mekemesi uıymdastyrǵan saltanatty keshke qoǵam qaıratkerleri, zııaly qaýym ókilderi men qala turǵyndary qatysty.
Quttyqtaý sózin alyp, keshti ashqan qala ákiminiń orynbasary Baqtııar Máken jyl saıyn til festıvali aıasynda elordada 300-ge deıin túrli baǵyttaǵy is-shara ótetinin, onyń barlyǵy memlekettik tildi damytýǵa baǵyttalǵanyn atap ótti.
«Dástúrge aınalǵan festıvaldi biz kúzde ótkizemiz, bul kezde memlekettik tildi damytýǵa baǵyttalǵan basqa da sharalar ótedi. Olar: «Memlekettik til - ult tiregi» otyrysy, «Til-amanat» aksııasy, «Oı-zerek» ıntellektýaldyq jarysy, «Qazaq tilin oqytý ádistemesi» ǵylymı-tájirıbelik konferensııasy jáne t.b. Búgingi tańda elorda ákiminiń tapsyrmasyna sáıkes, memlekettik mekemelerdiń mańdaıshalaryndaǵy jazýlardy latyn qarpine aýystyrý jumysy júrip jatyr», - deıdi B.Máken.
Budan bólek, B.Máken Abaı dańǵyly boıynda qazaq jazýshylarynyń alleıasy ashylǵanyn, sol alleıada Sáken Seıfýllın, Ilıas Jansúgirov jáne Beıimbet Maılınge eskertkish ornatý josparlanyp otyrǵanyn da aıta ketti.
Osydan birneshe apta buryn Prezıdent Qasym-Jomart Kemeluly «Til týraly» Zańnyń qabyldanǵanyna 30 jyl tolýyna oraı memlekettik tildiń mártebesin ósirip, qoldaný aıasyn keńeıtip, ultaralyq qatynas quralyna aınalýyna sińirgen eńbegi úshin birneshe til janashyrlaryn marapattaǵan bolatyn. Osy keshte qoǵam qaıratkerleri, til janashyrlary Kópbolsyn Bekmaǵanbetov, Bekjan Ábdýálıuly, Qaınar Oljaı men Kenjegúl Tergembaevalar alǵys hatpen marapattaldy.
Al Qazaqstan Respýblıkasynyń memlekettik tili, qazaq rýhanııatynyń altyn arqaýy, ultty biriktirýshi tuǵyr – qazaq tiliniń qoldanys aıasyn keńeıtýge jáne eldik murattardy nasıhattaýǵa qosqan úlesi úshin Nur-Sultan qalasy ákiminiń «Til tuǵyry» qurmet marapatyna Aldan Smaıyl, Erden Qajybek, Ospan Súleımenuly, Ánýarbek Qaıkenuly, Násipjan Abdrahmanqyzy, Nurlan Áýezhanuly, Arnur Qaınarbekuly, Almas Syrǵabaı men Vladıslav Ten, Alekseı Shırıaev ıe boldy.