Joshy Ulysy – Altyn Orda astanalary «Saraıshyq – Saraı-Batý – Saraı Berke qalalary izimen» atty halyqaralyq ǵylymı-zertteý, týrıstik ekspedısııasy Reseıdiń Astrahan oblysy, Volodar aýdany, Altynjar aýylyndaǵy «Qurmanǵazy» óńirlik mádenı ortalyǵynda boldy.
Uly kúıshi Qurmanǵazy Saǵyrbaıulynyń kesenesine zııarat etip, quran baǵyshtady.Sonymen qatar mádenı ortalyq qyzmetimen tanysyp, ózara yntymaqtastyq jóninde pikir almasty.
Aıta keteıik, uly kúıshiniń basyna 1996 jyly turǵyzylǵan kesene de, 2005 jyly Altynjar aýylynda ashylǵan mádenı ortalyq ta Qazaqstannyń kúshimen salynǵan. Kıiz úı formasyndaǵy úsh ǵımarattan turatyn ortalyq keshenin Atyraý, Batys Qazaqstan jáne Mańǵystaý oblystary turǵyzǵan. Munda qazir mýzeı, saz mektebi jáne qonaq úı kesheni jumys isteıdi.
- Atamyzdyń basyna kesene kóterilgen soń alys-jaqynnan arnaıy kelýshiler kóbeıdi. Meımandardy qabyldap alatyn qonaqúı qajettigi bilindi. Qazir Qurmanǵazy atyndaǵy óńirlik mádenı ortalyq Astrahan oblysynda ǵana emes, alys-jaqyn shetelderge de tanymal nysanǵa aınaldy. Qazaqstan, sonyń ishinde Atyraý oblysy byltyr ortalyq ǵımarattaryna kúrdeli jóndeý júrgizip berdi, - deıdi mádenı ortalyq dırektory Amangeldi Ábilǵazıev.
Búgin ekspedısııa músheleri Astrahan oblystyq tarıhı-ólketaný mýzeıinde bolyp, Saraıshyq tarıhynan syr shertetin shaǵyn kórme uıymdastyrmaq. Sosyn Altyn Orda handary jerlengen delinetin Lapas kóne qorymyn jáne Saraı Batý shaharynyń ornyn aralaıdy.
Osyǵan deıin Joshy Ulysy astanalary «Saraıshyq – Saraı-Batý – Saraı Berke qalalary izimen» atty halyqaralyq ǵylymı-zertteý ekspedısııasy jolǵa shyqqanyn habarlaǵan edik.