Ulttyq akademııalyq kitaphanada qazaq ádebıetindegi detektıv janrynyń negizin qalaǵan kórnekti jazýshy Kemel Toqaevty eske alýǵa arnalǵan «Dıdary dúnıeniń – detektıvte» atty kesh ótti.
Is-sharaǵa memleket jáne qoǵam qaıratkerleri men zııaly qaýym ókilderi qatysty. Jıyn barysynda sóz sóılegen fılologııa ǵylymdarynyń doktory Ádil Ahmetov: «Kemel aǵamyzdyń shyǵarmalary óte jaqsy qabyldandy. Agata Krıstı men Shekspırden keıin eń kóp oqylatyndardyń qatarynda. Bul janrdy búkil álem, ásirese jastar kóp oqıdy», – dedi. Al jazýshy Baıanǵalı Álimjan K.Toqaevtyń kitabyn kezekke turyp alatynyn eske alyp: «Saǵat Áshimbaev aǵamyz bir kúni detektıv janry jóninde maqala jazýdy tapsyrdy. Oqyrmandardyń 60 paıyzynan astamy kórkem shyǵarmalardan góri, detektıvtik janrdaǵy shyǵarmalardy oqıtyn kórinedi. Birinshi kezekte Kemel Toqaevtyń shyǵarmasy tur eken. Ol kisiniń povesterin taldap, salystyra otyryp, kólemdi maqala jazyp shyqtym», dep oıyn ortaǵa saldy.
«Kemel Toqaevtyń kınoǵa shyǵaratyn kemel beınesi bar. Jazýshynyń beınesi arqyly, bir tamasha kıno túsirýge bolady. Maǵan bir oı kelip otyr. Árbir shyǵarmashylyq kezdesýlerde jurttyń yqylasy meniń janymdy tebirentedi. Adamnyń qasıeti bolmasa, jazýshy bolmas edi. Maǵan Kemel aǵanyń «Sońǵy soqqy» romany unady. Syzyp turyp, óte qyzyǵyp oqydym. Bir qalypty, ustamdy jazylǵan shyǵarma», dep jalpy qaýymǵa usynys aıtqan fılologııa ǵylymdarynyń doktory Tursyn Jurtbaı avtordyń aldaǵy bolar júz jyldyǵyn atap ótti.