«Rýhanı jańǵyrý» baǵdarlamasy aıasynda M.O.Áýezov atyndaǵy Ádebıet jáne óner ınstıtýtynyń uıymdastyrýymen qazaq ádebıetiniń iri tulǵalary Sáken Seıfýllın, Ilııas Jansúgirov jáne Beıimbet Maılınniń týǵanyna 125 jyl tolýyna oraı «Úsh báıterek muraty jáne ádebı dástúr sabaqtastyǵy» atty respýblıkalyq ǵylymı-tájirıbelik konferensııa ótti.
Is-sharanyń maqsaty qazaq rýhanııatynyń úsh báıteregi atanǵan Sáken Seıfýllın, Ilııas Jansúgirov jáne Beıimbet Maılınniń ádebı murasyn rýhanı jańǵyrý konteksinde ári fılologııadaǵy sońǵy paradıgmalar turǵysynan qarastyrý jáne kópshilikke nasıhattaý.
Alqaly basqosýǵa M.O.Áýezov atyndaǵy Ádebıet jáne óner ınstıtýtynyń dırektory, f.ǵ.d Kenjehan Matyjanov, Abaı atyndaǵy Qazaq ulttyq pedagogıkalyq ýnıversıtetiniń professory, f.ǵ.d Serik Asylbekuly, M.O. Áýezov atyndaǵy Ádebıet jáne óner ınstıtýtynyń bas ǵylymı qyzmetkeri, f.ǵ.d Aqysh Nurdáýlet, Ál-Farabı atyndaǵy Qazaq ulttyq ýnıversıtetiniń professory, f.ǵ.d Kúlásh Ahmet bastaǵan ǵalymdar men ádebıet alyptarynyń shyǵarmashylyq murasyn san qyrynan zerttegen oqý oryndary men ǵylymı-zertteý mekemeleriniń ádebıettanýshy, folklortanýshy mamandary, stýdent, magıstrant, doktoranttar qatysty.
Zertteýshiler ult ádebıetiniń alyptaryna aınalǵan shyǵarmashyl tulǵalardyń túrli janrdaǵy zertteý eńbekteri jaıynda oı-tujyrymdar usyndy. Sonymen qatar olardyń jeke kórkemdik ustanymdaryn anyqtaý, ádebı-kórkem jáne ǵylymı murasyna qatysty zertteý jumystarymen tanysý, týyndylaryndaǵy negizgi taqyryptardyń beınelený joldaryn jańa ǵylymı paradıgma aıasynda taldaý, otandyq folklortaný men ádebıettanýdy damytýǵa qosqan úlesin saralaý, shyǵarmalaryn shet tiline aýdarýdyń mańyzyn baǵamdaý, nasıhattaý jumystary talqylandy.